Ingabo z'u Rwanda zubatse ibyumba 3 by'amashuli muri El Fasher, Sudan

Ingabo za batayo ya 47 ziri mu butumwa bw'amahoro bwa Loni i Darfur, muri Sudan zujuje ibyumba by'amashuli 3 zashyikirije Leta mu mpera z'icyumweru dusoje, ahitwa El Fasher.

Kubaka ibi byumba by'ishuli ry'abakobwa ndetse n'ibiro by'abazariyobora,  byatekerejwe na UNAMID Christian Fellowship biyemeje gukorana n'ingabo z'u Rwanda za batayo ya 47, kubera ko zimenyereye ibikorwa nk'ibi byo gufasha abaturage.

Prof. YOUSUF ISAAC AHMAD, umunyamabanga wa Leta ushinzwe uburezi mu ntara ya Darfur wayoboye uyu muhango wo kwakira aya mashuli, yashimye izi ngabo ku bw'aka kazi zifatanya no kubungabunga amahoro. Yibutsa ko ibi byumba 3 n'ibiro byuzuye bisanga ibindi 2 byubatswe mbere umwaka ushize n'ingabo za batayo ya 44 na yo y'u Rwanda.

Uyu muhango witabiriwe n'abayobozi bo mu nzego zo hejuru bo muri guverinoma, abahagarariye ubutumwa bwa UNAMID, ingabo ziburimo ndetse n'abaturage.