Burera: Hari abaturage babangamiwe no kutagira amazi meza bituma bavoma igishanga cya Kamiranzovu

Bamwe mu batuye Umurenge wa Butaro mu Karere ka Burera, baravuga ko babangamiwe no kutagira amazi meza bigatuma bakoresha ayo mu gishanga cya Kamiranzovu.

Aba baturage bavuga ko Imidugudu ya Kagoma, Nyanamo na Biyove ariyo yibasiwe n’iki kibazo cyo kutagira amazi meza.

Ikikije igishanga cya Kamiranzovu kinyurwamo n’imigezi bavomamo amazi yo gukoresha imirimo itandukanye ariko hari n’igihe ngo bayanywa.

Aba baturage bavuga ko byashoboka kuyabagezaho kuko hari abakikije mu yindi midugudu bafite amazi meza.

Umuyobozi w’Akarere ka Burera, Mukamana Soline yizeza aba baturage ko mu gihe kitarenze amezi atanu iki kibazo kizaba cyakemutse kuko imirimo yo gusana umuyoboro w’amazi Kinyababa-Nyabizi uzabaha amazi igeze kuri 75%.

Umuyoboro w’amazi wa Nyabizi uzaha aba baturage ba Butaro amazi ureshya n’ibirometero bisaga 12, ukazuzura utwaye Miliyoni zisaga 169 Frw.

Uwimana Emmanuel