U Rwanda rwashyikirije u Buhinde umuturage wabwo ukekwaho iterabwoba

U Rwanda rwashyikirije u Buhinde Salman Khan kugira ngo akurikiranweho ibyaha by'iterabwoba n'ibindi bifitanye isano.

Mu gitondo cyo kuri uyu wa Gatatu, tariki ya 27 Ugushyingo 2024, ni bwo ku Kibuga cy'Indege Mpuzamahanga cya Kigali inzego z'ubutabera mu Rwanda zamushyikirije iz'u Buhinde.

Salman Khan yashyikirijwe igihugu cye nyuma y’ubusabe bwatanzwe n’u Buhinde nyuma yo gucyeka ko ari mu Rwanda.

Inzego z’Umutekano nyuma yo kumushakisha agafatwa zahise zimenyesha u Buhinde ko yabonetse bategura igikorwa cyo kumutanga.

Salman Khan wari wambitswe amapingu yari aherekejwe n’abapolisi babiri. Yasinye ku mpapuro impande zombi zahererekanyije mbere y’uko abahagarariye ibihugu byombi basinya ko bamwakiranye n’ibyo yafatanywe mu Gihugu byose.

Umushinjacyaha ku rwego rw’Igihugu, Siboyintore John Bosco, yavuze ko u Rwanda ari Igihugu kigendera ku mategeko kandi kitihanganira abanyabyaha.

Yagize ati “U Rwanda si ahantu h’ubwihisho. Ntabwo ari igihugu wazamo, warakoze ibyaha hirya no hino ngo uze kwihisha.”

Salman Khan ni we wa mbere u Rwanda rwahaye u Buhinde muri ubu buryo ndetse nta Munyarwanda iki gihugu kirohereza bitewe n’uko nta busabe u Rwanda ruroherereza u Buhinde.