Umuryango AGRA wiyemeje gukorana n'u Rwanda mu kongera umusaruro mu buhinzi

Perezida w’Umuryango Nyafurika uharanira guteza imbere Ubuhinzi (AGRA), Dr Agnes Kalibata aravuga ko uyu muryango witeguye gukorana n’u Rwanda mu bikorwa bigamije kongera umusaruro mu buhinzi aho mu myaka 5 uyu muryango uzashora arenga miliyari 60 Frw.

Ibiganiro byahuje Minisitiri w’Ubuhinzi n’Ubworozi, Dr Cyubahiro Bagabe Mark na Perezida wa AGRA, Dr Agnes Kalibata byashimangiye ku kwihaza mu biribwa, iyi ikaba ari ingingo igomba kwitabwaho mu myaka 5 iri imbere.

Ibi byatumye Minisiteri y'Ubuhinzi n'Ubworozi ihura n'umuryango wa AGRA kugira ngo izi nzego zirebera hamwe igikwiye gukorwa. 

Minisitiri w'Ubuhinzi n'Ubworozi, Dr Cyubahiro Mark Bagabe agaragaza ko hari iby'ibanze kugira ngo intego yo kwihaza mu biribwa izagerweho.

Ubu kwihaza ku mbuto nziza y'ibirayi biri ku kigero cya 10% mu gihe ku bigori ari  90%. 

Umuyobozi wa AGRA, Dr Kalibata Agnes avuga ko uyu muryango uzashyira miliyoni 50 z’Amadorari ya Amerika mu buhinzi n’ubworozi mu myaka 5 iri imbere.

AGRA kandi yitezweho guhuza inzego zitandukanye mu guteza imbere ubuhinzi n'ubworozi.

Minisiteri y'Ubuhinzi n'Ubworozi kandi ivuga ko hari gahunda yo kongera umusaruro uhunikwa ushobora gukoreshwa mu bihe bidasanzwe ukava kuri toni ibihumbi 40 zishobora gutunga abaturage mu mezi 3 ukagera kuri toni ibihumbi 200 ku mwaka, zishobora gutunga abaturage mu gihe cy'amezi 6, ibi bikazagerwaho mu mwaka utaha wa 2025.