Abafite ubumuga bwo kutabona basabye kudahezwa mu bikorwa bya siporo rusange

Abafite ubumuga bwo kutabona basabye ko na bo bajya boroherezwa kwitabira siporo rusange kandi n’inkoni yera bitwaza ikarushaho kumenyekanishwa.

Ubu busabe babutanze ubwo bitabiraga Siporo Rusange, izwi nka Car Free Day, isanzwe iba 2 mu kwezi. Iyi gahunda yanahuriranye n’Umunsi Mpuzamahanga w’Inkoni Year, ku Cyumweru, tariki ya 24 Ugushyingo 2024.

Ni siporo yaranzwe n’urugendo, imyitozo ngoramubiri itandukanye. Mu bayitabiriye harimo n’abafite ubumuga bwo kutabona, bari bitwaje inkoni yera.

Mu busabe bwabo, abafite ubumuga bwo kutabona basabye ko buri kwezi bajya boroherezwa kuyitabira mu rwego rwo kumenyekanisha inkoni yera.

Bamwe mu batuye Umujyi wa Kigali bitabiriye iyi siporo rusange bavuze ko ntawe ukwiye guhezwa muri iyi siporo by’umwihariko abafite ubumuga.

Umuyobozi w’Ihuriro Nyarwanda ry’Abafite Ubumuga bwo kutabona, Dr Mukarwego Beth Nasphore, yavuze ko kwitabira Siporo Rusange bituma abafite ubumuga barushaho kwiyumvamo n’izindi gahunda za Leta.

Mu butumwa bwe, Mukarwego yasabye ko abafite ubumuga bwo kutabona bajya bafashwa kumenya ibyo abandi bari gukora.

Minisitiri wa Siporo, Nyirishema Richard, yagargaje ko siporo ari ubuzima kandi buri wese afite uburenganzira bwo kuyitabira.

Yatanze icyizere ko imbogamizi z’abafite ubumuga bwo kutabona zizakomeza gushakirwa ibisubizo.

Siporo Rusange yahaye umwihariko abafite ubumuga bwo kutabona yabaye mu gihe u Rwanda rwitegura kwizihiza Umunsi Mpuzamahanga w’Abafite Ubumuga uzaba ku wa 3 Ukuboza 2024.

Jean Paul Turatsinze