Amaze imyaka 30 mu Bufaransa ashakisha umuryango we: Ubuhamya bwa Urambariziki warokotse Jenoside

Jeanine Urambariziki warokotse Jenoside yakorewe Abatutsi mu 1994 amaze imyaka 30 mu gihugu cy’u Bufaransa, akaba akomeje gushakisha umuryango we kuko kugeza ubu atazi inkomoko ye cyane ko yajyanywe muri iki gihugu ari uruhinja rw’imyaka 3.

Ku nshuro ya mbere Jeanine Urambariziki nibwo ageze mu Rwanda, nta Kinyarwanda azi, nta gace na kamwe ko mu Rwanda azi, yewe nta n'umuvandimwe we azi ko agira, gusa hashize imyaka 30 atuye mu gihugu cy’u Bufaransa yifashsisha Gaudiose Uwanyirigira umwunganira mu gusobanura uru rugendo rwe rw’ubuzima.

Gusa nubwo bigoye we avuga ko afite icyizere cyo kubona umuryango we ndetse akaba afite n’inyota yo kumenya neza igihugu akomokamo.

Jeanine Urambariziki na Gaudiose bakomeza bashimira cyane abasakaje ubutumwa bwabo ku mbuga nkoranyambaga zitandukanye nubwo hari bamwe baboneyeho kuvuga ko yabonye umuryango we kandi atari byo.

Bakomeza bashimira cyane Leta y’u Rwanda uburyo ikomeje kubafasha ibishoboka byose kugira ngo Jeanine Urambariziki abashe kubona abo mu muryango we.

Gaudiose Uwanyiligira avuga ko Jeanine yishimiye kugera mu Rwanda cyane bitewe n’uburyo yakiriwe ndetse akabasha kubona aho yavukiye, kuri ubu Jeanine Urambariziki afite imyaka 33 y’amavuko akaba we n’umuryango batuye mu gihugu cy’uBufaransa mu Mujyi wa Strasbourg.

Enorah Gladys