Amacakubiri nta mwanya afite mu gihugu cyacu- Dr Kalinda

Ibi yabitangarije i Musanze mu gikorwa cy'Umuganda usoza ukwezi k'Ugushyingo aho Abasenateri 5 bifatanyije n'abaturage gutera ibiti 8000 bivangwa n'imyaka.

Perezida wa Sena wifatanyije n’Abanya-Musanze mu muganda usoza ukwezi k'Ugushyingo ahatewe ibiti bigera ku 8000, avuga ko yishimira iterambere rigaragara by’umwihariko mu Karere ka Musanze. 

Ku ngingo y’ubumwe bw’Abanyarwanda ashingiye ku ngero z'abarokotse Jenoside yakorewe Abatutsi bamaze iminsi bicwa abandi bagahohoterwa, Dr Kalinda yashimangiye ko igihugu kirimo amacakubiri kidatera imbere aboneraho gusaba Abanyarwanda kwirinda ibintu byose bishobora kubacamo ibice.

Yagize ati "Tugomba gukumira no kurwanya ingengabitekerezo ya Jenoside aho yaba ituruka hose. Amacakubiri nta mwanya afite mu gihugu cyacu kuko igihugu kirimo amacakubiri nta n’iterambere rishoboka na gato"

Mu bitekerezo n’ibibazo byatanzwe n’abaturage bagaragarije Perezida wa Sena ko basonzeye kwegerezwa ibikorwaremezo by’imihanda, amashanyarazi n’amazi bigakwira hose kandi ikibazo cy’ubucucike mu mashuri kigakemurwa burundu. 

Abaturage bavuga ko barajwe ishinga n’ibibateza imbere naho ibyo by’amacakubiri basaba abo birangwaho guca ukubiri nabyo.

Ashimangira isano muzi y’Abanyarwanda, Perezida wa Sena yibukije Abanyamusanze ko NdI Umunyarwanda ariyo basabwa kubakiraho ubumwe bwabo bakubaka u Rwanda bafatanyije.

Mu bundi butumwa abaturage basabwe kurwanya amakimbirane hagati y'abashakanye ijisho ry'umuturanyi rikigaragaza, kandi hakarwanywa imirire mibi n'igwingira ry'abana rikomeje kuvugwa mu Turere tw’Intara y’Amajyaruguru ndetse n’isuku ikimikwa hose.