Perezida Kagame ari muri Barbados mu ruzinduko rw'akazi

Ku mugoroba wo ku wa Gatanu, Perezida wa Repubulika Paul Kagame yageze muri Barbados mu ruzinduko rw'akazi. Ku Kibuga Mpuzamahanga cy'Indege cya Grantley Adams yakiriwe na Minisitiri w'Ububanyi n'Amahanga w'iki gihugu, Jerome Xavier Walcott.  

Uruzinduko rwa Perezida Kagame, kuri uyu wa Gatandatu, ruratangira agirana ibiganiro na Perezida wa Barbados, Dame Sandra Prunella Mason mbere yuko agirana ibiganiro bibera mu muhezo na Minisitiri w'Intebe w'iki gihugu Mia Amor Mottley.

Muri uru ruzinduko kandi, Perezida Kagame na Minisitiri w'Intebe Mottley barahura n'ibyamamare mu mukino wa Cricket bakanyujijeho barimo Sir Wes Hall, Sir Gary Sobers n'abandi.

Umukuru w'Igihugu cy'u Rwanda na Minisitiri w'Intebe wa Barbados baragirana kandi ikiganiro n'abanyamakuru kivuga ku birimo gukorwa ngo hakomeze hashimangirwe umubano w'u Rwanda na Barbados.

Biteganyijwe kandi ko Minisitiri w'Intebe Mottley na Minisitiri w'Intebe wungirije Santia Bradshaw baza kwakira ku meza Perezida Kagame ku ifunguro ryo ku manywa.

Aba banyacyubahiro baraza gutera ibiti mu busitani buzwi nka National Botanical Gardens. Bakaza no kuhavugira ijambo.