Rusizi: Ku munsi wa mbere w’ingendo abanyura i Huye babuze uko babigenza

Ku munsi wa mbere wo gusubukura ingendo hagati y’uturere n’intara, abategera imodoka muri gare ya Rusizi bari bake cyane kandi n’amagence menshi atwara abantu muri rusange nta modoka yari afite i Rusizi. Ubuyobozi bwa gare ya Rusizi buvuga ko buri kuvugana na ba nyiri amagence ngo baze bakomeze imirimo kubera ko imodoka zose bari barazitwaye I Kigali.

Kimwe mu bintu byari bihenze ni ukuva cyangwa kuza i Rusizi muri iyi minsi ingendo hagati y’uturere n’intara zari zibujijwe.

Nyuma y’uko inama y’abaministri y’ejo hashize yemeje ko ingendo zemewe, mu gitondo cyo kuri uyu wa Kabiri muri gare ya Rusizi abatega imodoka bari bake cyane bigaragara. Kugeza ubwo twahavaga ahagana saa tatu, ibigo bitwara abagenzi muri rusange bitatu gusa ni byo byari byafunguye imiryango, na byo byari bimaze kurekura imodoka ebyiri zonyine zigiye hirya no hino mu tundi turere. Abagenzi bari bazindutse bishimiye icyemezo cyo gufungura ingendo.

Ibiro by’ibigo birenga 6 bitwara abagenzi muri gare ya Rusizi birafunze! Ndetse ibigo nka Volcano, Capital na Ritco nta modoka zabyo ziri i Rusizi. Hejuru y’ibi kandi, kugeza ubwo twavaga muri iyi gare nta modoka n’imwe iturutse Ii Kigali cyangwa i Huye itwara abagenzi mu buryo bwa rusange yari yakandagira muri gare ya Rusiz. 

Muri gare ya Rusizi imodoka nkeya zari zihari byasabye ko zikorerwa indi mirimo ya tekinike kugira ngo zibashe kugenda. Ngo zari zarakwamye kubera kumara igihe kirekire zidakora. Ibyatsi byameze hirya no hino muri gare kubera kumara iminsi idakoreshwa. Ibiciro ntibyahindutse. Byibuze ngo nka nyuma y’iminsi 2 ni bwo ibintu bizaba byasubiye mu buryo muri iyi gare.

Aphrodis MUHIRE