Impamvu u Rwanda rwatoranijwe kwakira icyicaro cy'ikigo nyafurika cy'imiti

Ubuyobozi bw'ikigo gishinzwe kugenzura ibiribwa n'imiti, Rwanda FDA buvuga ko kuba u Rwanda rwaratoranijwe kugira ngo rugire icyicaro cy'ikigo nyafurika cy'imiti, African Medecines Agency byatewe n'impamvu zinyuranye zirimo ubuyobozi bwiza igihugu gifite, imiyoborere myiza ndetse n'umutekano.

Mu  bihugu 13 byari byagaragaje ko byifuza kwakira icyicaro cy'ikigo AMA, ibihugu 8 gusa nibyo byatanze ibisabwa byose maze nyuma u Rwanda rutoranywa nk'igihugu cyahize ibindi kigomba kwakira icyo cyicaro.

Umuyobozi mukuru wa Rwanda FDA, Dr.Emile Bienvenu avuga ko ari iby'agaciro gakomeye kuba u Rwanda rugiye kuba icyicaro cy'ikigo cy'Umuryango w'Afurika yunze ubumwe.

Dr.Emile avuga kandi ko kuza mu Rwanda kwa AMA kubaye mu gihe Leta y'u Rwanda ikomeje gushyira imbaraga mu kugeza ku baturage imiti yujuje ubuziranenge.

Twababwira ko ikigo AMA ari icya 2 umugabane w'Afurika ufite nyuma y'ikigo Africa CDC gifite mu nshingano gukurikirana indwara, u Rwanda rukaba rwaramaze gutegura ibisabwa byose birebana no gutangira kukorera mu Rwanda kw'ikigo AMA.

Ibi bigo byombi bikaba bizagira uruhare rukomeye mu kubungabunga ubuzima bw'abatuye umugabane w'Afuirika.