Umukino wa Rayon Sports na APR FC washyizwe mu Kuboza 2024

Urwego rugenzura Shampiyona y'Icyiciro cya Mbere, Rwanda Premier League, rwemeje ko umukino w'ikirarane cy'umunsi wa gatatu Rayon Sports izakiramo APR FC uzabera kuri Stade Amahoro, ku wa 7 Ukuboza 2024. 

Itangazo ryemeza igihe uyu mukino wari umaze iminsi uteza impaka ku itariki uzaberaho, ryashyizwe hanze ku mugoroba wo kuri uyu wa Mbere, tariki ya 25 Ugushyingo 2024.

Rwanda Premier League ibinyujije ku rukuta rwayo rwa X yatangaje ko umukino wa Rayon Sports na APR FC uzabera kuri Stade Amahoro, saa Kumi n’Ebyiri zo ku wa Gatandatu, tariki ya 7 Ukuboza 2024.

Ku ikubitiro uyu mukino wagombaga kuba ku wa 14 Nzeri 2024 ariko urasubikwa kubera APR FC yari mu marushanwa Nyafurika ya CAF Champions League.

Rwanda Premier League yatanze iya 19 Ukwakira 2024 nk’itariki nshya umukino waberaho ariko APR FC igaragaza ko ibirarane bikwiye gukinwa uko bikurikirana, bivuze ko hatari gukinwa icy’umunsi wa gatatu kandi iby’umunsi wa mbere n’uwa kabiri bigihari.

Mbere y’uko amakipe yombi ahura, Rayon Sports ifite umukino umwe izakirwamo na Vision FC ku wa 30 Ugushyingo 2024, hazaba hakinwa umunsi wa 11 wa shampiyona.

Ku rundi ruhande, APR FC ifite imikino ibiri irimo ikirarane izakiramo Bugesera FC ku wa 27 Ugushyingo ndetse n’umukino w’umunsi wa 11 izakirwamo na AS Kigali ku wa 1 Ukuboza 2024.

APR FC yitegura kwakira mukeba wayo mu gihe umusaruro wayo utishimiwe cyane n’abafana ndetse n’abayobozi bayo.

Mu gitondo cyo ku Cyumweru, Umuyobozi w’Icyubahiro wa APR FC, General Mubarakh Muganga, yahuye n’abakozi b'ikipe, abibutsa ko intego ndetse n'imyitwarire ikwiye kubaranga.

Mu butumwa yabahaye, Gen Mubarakh yabwiye abakinnyi ko abafana baba babakeneyeho intsinzi.

Nyuma y’imikino 10 imaze gukinwa muri Shampiyona y’u Rwanda, APR FC iri ku mwanya wa 10 n’amanota 11 mu gihe Rayon Sports ya mbere ifite amanota 23.

Umukino w'umunsi wa gatatu wa Shampiyona y'umupira w'amaguru wogombaga guhuza Rayon Sports na APR FC washyizwe ku itariki ya 7 Ukuboza 2024.

Urwego rushinzwe gutegura Shampiyona y'u Rwanda "
Rwanda Premier League" rwatangaje ko uyu mukino uzabera muri Stade Amahoro. #RBASports pic.twitter.com/UwtxURPs44

— Rwanda Broadcasting Agency (RBA) (@rbarwanda) November 25, 2024