Umusirikare w'u Rwanda yapfiriye muri Santarafurika

MINUSCA yatangaje ko umusirikare w'u Rwanda wari mu butumwa bw'amahoro bwa Loni  muri Santarafurika yapfiriye mu gitero cy'inyeshyamba kuri uyu wa Mbere, ubwo bari bari ku burinzi.

Ingabo z'u Rwanda zari ziri mu burinzi mu gace ka Sam - Ouandja mu Ntara ya Haute - Kotto ma Majyaruguru ashyira uburasirazuba bw'iki gihugu.

Minisiteri y'Ingabo z'u Rwanda yatangaje ko yamaganye iki gitero kandi ko yihanganishije umuryango n'inshuti z'uyu musirikare waguye muri iki gitero.

Ingabo z'u Rwanda kandi zatangaje ko nubwo byagenze gutyo ziteguye gukomeza kurinda abasivili binyuze mu butumwa bw'amahoro bwa MINUSCA cyangwa ubundi butumwa zakoherezwamo.

Jean-Pierre Lacroix, Umufaransa ushinzwe ibijyanye n'ubutumwa bwo kubungabunag amahoro mu muryango w'Abibumbye yatangaje ko yababajwe n'urupfu rw'umusirikare w'u Rwanda wapfuye ari mu butumwa bwo kurinda abasivili n'abashinzwe ibikorwa by'ubugiraneza. Yatangaje ko yifatanyije mu kababaro na Guverinoma y'u Rwanda, abaturage b'u Rwanda ndetse numuryango n'inshuti z'uyu musirikare.

Ubutumwa bwa MINUSCA bwo bwatangaje ko batatu mu bagabye icyo gitero nabo barashwe bakahasiga ubuzima mu gihe umwe muri bo yafashwe mpiri.

Umuyobozi wa MINUSCA, Valentine Rugwabiza yamaganye icyo gitero cyahitanye umusirikare w’u Rwanda. Yongeyeho ko urwo rupfu rutabaciye intege kubera ko bagomba gushimangira umuhate wa MINUSCA mu gukomeza gushyira mu bikorwa inshingano zayo zo kurinda abasivile no gushyigikira ubuyobozi bwa

Madamu Rugwabiza yashimye imbaraga Ingabo z’u Rwanda zari ziri ku burinzi zagaragaje mu gusubiza inyuma icyo gitero no kurinda abatuye Sam-Ouandja.

MINUSCA yasabye ubuyobozi bwa Santarafurikagukora ibishoboka byose hakamenyekana abagabye icyo gitero no kubageza imbere y’ubutabera.

Jean Paul Niyonshuti