Australia: Abana bari munsi y’imyaka 16 mu nzira zo gukumirwa ku mbuga nkoranyambaga

Guverinoma ya Australia yatangije umushinga w'itegeko rikumira abana bari munsi y'imyaka 16 gukoresha imbuga nkoranyambaga, inateguza ibihano by’ihazabu ishobora kugera kuri miliyoni 33 z’amadolari ya Leta Zunze Ubumwe za Amerika ku bigo bitubahirije ayo mabwiriza.

Ku wa Kane, tariki ya 21 Ugushyingo 2024, ni bwo Minisitiri w'Itumanaho muri Australia, Michelle Rowland, yagejeje uyu mushinga ku Nteko Ishinga Amategeko y’iki gihugu.

Yavuze ko imbuga nkoranyambaga zirimo TikTok, Facebook, Snapchat, Reddit, X na Instagram ziri mu zishobora guhanishwa gutanga amande ya miliyoni $33 kubera kunanirwa gushyiraho uburyo bubuza abakiri bato kuzigiraho konti.

Muri uyu mushinga biteganyijwe ko mbere y’uko umuntu afungura konti ku mbuga nkoranyambaga hazajya habanza kugenzurwa imyaka ye hifashishijwe ikoranabuhanga nk’iryo kureba ibikumwe cyangwa umwirondoro we wemewe na Leta.

Uyu mushinga nuba itegeko, Australia izaba igihugu cya mbere ku Isi cyashyizeho imyaka iri hejuru yo kwemerera abana gukoresha imbuga nkoranyambaga.

Minisitiri w’Intebe wa Australia, Anthony Albanese, yavuze ko aya mavugurura akwiye gushyigikirwa ndetse n’ibigo bifite imbuga nkoranyambaga byasabwe kubigiramo uruhare.

Amashyaka atavuga rumwe n’ubutegetsi bwa Australia arimo Liberal Party yemeye gushyigikira uyu mushinga mu gihe Green Party yasabye ibisobanuro birambuye kuri wo, igaragaza ko uzagira ingaruka ku mbuga nkoranyambaga zirimo Instagram, Facebook, TikTok, X na Snapchat.

Minisitiri w’Intebe Anthony Albanese yavuze ko abana bazakomeza gukoresha ikoranabuhanga rituma babona imikino yo kuri internet no kwiga amasomo abafasha kwagura intekerezo zabo binyuze muri Google Classroom na YouTube.

Leta ya Australia yatekereje kuri uyu mushinga nyuma yo gusanga imbuga nkoranyambaga zigira ingaruka ku buzima burimo n’ubwo mu mutwe bw’umwana.

Nibura 2/3 by’abana bari hagati y’imyaka 14-17 barebye ibintu byangiza ubuzima bwabo birimo ikoreshwa ry’ibiyobyabwenge, kwiyahura n’ibindi bifite ingaruka ku buzima bwabo.

Usibye kuvana abana bari munsi y'imyaka 16 ku mbuga nkoranyambaga, Australia yatangiye no gutekereza uko abana bari munsi y'imyaka 18 bakumirwa ku kureba filime z'urukozasoni ziboneka kuri internet.

Australia si igihugu cya mbere gitekereje kuri uyu mushinga kuko mu mwaka ushize u Bufaransa bwasabye ko abana bari munsi y’imyaka 15 badakoresha imbuga nkoranyambaga ariko kuri bamwe byahindutse kubera ubushake bw’umubyeyi.

Leta Zunze Ubumwe za Amerika na zo zigeze gusaba ibigo by’ikoranabuhanga gusaba ababyeyi uruhushya kugira ngo abana bari munsi y’imyaka 13 bashobore kugera ku makuru ari kuri internet.

Iradukunda Gloria