Meteo Rwanda yateguje imvura idasanzwe mu mpera z’Ugushyingo

Ikigo cy’Igihugu cy’Ubumenyi bw’Ikirere, Meteo Rwanda, cyatangaje ko mu mpera z'Ugushyingo 2024 hateganyijwe imvura iri hejuru y’ikigero cy’isanzwe igwa mu bice byose by’Igihugu.

Itangazo rya Meteo Rwanda ryo ku wa Gatatu, tariki ya 20 Ugushyingo 2024, ryagaragaje ko mu gice cya gatatu cy’ukwezi k’Ugushyingo 2024 (kuva tariki ya 21 kugeza tariki ya 30 Ugushyingo) mu Rwanda hateganyijwe ingano y’imvura iri hagati ya milimetero 50 na milimetero 200.

Rikomeza rivuga ko “Imvura iteganyijwe iri hejuru y’ikigero cy’imvura isanzwe igwa muri iki gice.’’

Meteo Rwanda yanagaragaje ko muri iki gihe hazaba hari umuyaga ufite umuvuduko uri hejuru mu Karere ka Nyaruguru, Huye na Nyamagabe ndetse no mu bindi bice by’Igihugu.

Abaturage basabwe gukaza ingamba zo kwirinda ibyago bishobora guterwa n'imvura nyinshi n'umuyaga mwinshi uteganyijwe muri iki gihe.

Ikigo cy’Igihugu cy’Ubumenyi bw’Ikirere, Meteo Rwanda, cyatangaje ko mu mpera z'Ugushyingo 2024 [tariki ya 21-30 Ugushyingo] hateganyijwe imvura iri hejuru y’ikigero cy’isanzwe igwa mu bice byose by’Igihugu.

Abaturage basabwe gukaza ingamba zo kwirinda ibyago bishobora guterwa… pic.twitter.com/22FfAqnUYu

— Rwanda Broadcasting Agency (RBA) (@rbarwanda) November 20, 2024