Abayoboke b'Ishyaka PL biyemeje gushyigikira gahunda mbaturabukungu ya NST2

Yanditswe Nov, 10 2024 20:32 PM | 71,775 Views

Abayoboke b’Ishyaka riharanira Ukwishyira ukizana kwa buri muntu PL barahamya ko banyuzwe n’ imitegurire n’imigendekere ndetse n’ibyavuye mu matora yabaye mu kwezi kwa 7 uyu mwaka wa 2024.

Ni mu gihe imyanya iri shyaka ryabonye mu u Nteko Ishinga Amategeko imitwe yombi yiyongereye ugereranyije n'uko byari bimeze muri manda ishize.

Umutekano waranze aya matora guhera mu bihe byo kwiyamamaza kugeza mu matora nyirizina, imiteguriro yayo n'ibindi, ni bimwe mu byishimirwa n'abayoboke b'iri shyaka rya PL, gusa by'umwihariko bashimishwa n'ibyayavuyemo nk'uko bisobanurwa n'Umuyobozi w'iri shyaka Hon. Donatille Mukabalisa.

Bahereye aha rero abayoboke b'iri shyaka bavuga ko bashyize imbere gutanga umusanzu wabo mu iterambere ry’Igihugu, ubu bakaba babitangiye bakarishya ubumenyi mu kwihangira umurimo mu mahugurwa yateguriwe abayoboke baryo bahagarariye abandi mu Mujyi wa Kigali.

Hon. Mukabalisa kandi avuga ko ibiri gukorwa kuri ubu ari gushyira imbaraga mu byo bakora dore ko ibyinshi biri muri gahunda y’iri shyaka y’imyaka itanu binahura n’ ibiri muri gahunda ya Guverinoma y’imyaka 5 yo kwihutisha iterambere, NST2.

Ubu mu Nteko Ishinga Amategeko hari Abadepite 10 n' Abasenateri babiri bose b'abayoboke b'Ishyaka PL.

Ubuyobozi bw’ iri shyaka kandi bukomeje ubukangurambaga ku bayoboke baryo n’ Abanyarwanda muri rusange ku kwihatira kunoza umurimo, kubyaza umusaruro amahirwe Igihugu cyashyizeho hagamijwe ko biteza imbere ari nako bateza imbere igihugu muri rusange.