Uganda: Inkuba yishe abana 14 abandi 34 barakomereka ubwo bari mu rusengero

Polisi ya Uganda ivuga ko inkuba yishe abana 14 abandi 34 barakomereka, ubwo bari mu rusengero ruherereye mu nkambi y'impunzi ya Palabek icumbikiye Abanya-Sudani y'Epfo.

Ibyo byabereye mu Karere ka Lamwo mu Majyaruguru ashyira Uburengerazuba bw'icyo gihugu.

Umuvugizi wa Polisi ya Uganda, Kituuma Rusoke yavuze ko umuntu mukuru uri mu bishwe n'iyi nkuba yari afite imyaka 21.

Ishami ry'Umuryango w'Abibumbye ryita ku mpunzi (UNHCR) rivuga ko inkambi y'impunzi ya Palabek icumbikiye impunzi n'abasaba ubuhungiro bose hamwe barenga 80,000, benshi baturuka muri Sudani y'Epfo ihana imbibi na Uganda.

BBC ivuga ko mu myaka ine ishize, inkuba yishe abana 10 mu Mujyi wa Arua, na wo wo mu Majyaruguru ashyira Uburengerazuba bwa Uganda.