Trump na Harris bagiye guhatanira kuyobora Amerika

Kuri uyu wa Kabiri tariki 05 Ugushyingo 2024, Abanyamerika barazindukira mu matora y'Umukuru w'Igihugu.

Umukandida Donald Trump w'Ishyaka ry'Abarepubulikani, wanayoboye iki gihugu kuva 2017-2021 ndetse na Kamala Harris uhagarariye Ishyaka ry'Abademukarate, unasanzwe ari Visi Perezida w'iki gihugu, nibo baza imbere mu guhatanira uyu mwanya.

Bimwe mu byo wamenya ku matora yo muri Amerika.

Kamala Harris atowe, yaba akoze amateka yo kuba ari we mugore wa mbere waba uyoboye iki gihugu.

Amatora ya Perezida muri iki gihugu aba buri myaka ine, ari nayo manda wa perezida aba afite. Ataha azaba mu mwaka wa 2028. Ay'uyu mwaka akazaba abaye ku nshuro ya 60, mu gihe abaperezida 46 ari bo bamaze kuyobora iki gihugu.

Amabarura y'amajwi agaragaza ko Trump na Harris baza imbere haba muri Leta zifite ubwiganze bw'amashyaka zishyigikiye, ndetse n'izindi leta zitagira uruhande zizwi nka swing states.

Ihungabana ry'ubukungu, intambara mu Burasirazuba bwo hagati, abimukira ndetse n'ihindagurika ry'ibihe, ni bimwe mu bibazo uzatorwa azahangana nabyo.

Kugeza ubu Joe Biden wo mu Ishyaka ry'Abademukarate ni we uyoboye iki gihugu, akaba yarahagaritse ibikorwa byo kwiyamamaza aharira Visi Perezida we Kamala Harris, ahanini bitewe n'izabukuru. 

Jean-Paul Niyonshuti