Kigali: Hatangiye amahugurwa y'abashinzwe gucunga inzibutso ziri ku rutonde rw'Umurage w'Isi

Yanditswe Nov, 11 2024 19:53 PM | 71,012 Views

Mu Rwanda hari gutangirwa amahugurwa ku bashinzwe gucunga inzibutso ziri ku rutonde rw’umurage w’isi wa UNESCO kugira ngo barusheho gusobanukirwa ibyerekeranye n'amahame y'Umurage w'Isi no gushyigikira uburyo bw'imyitwarire bufatika mu gucunga no gusobanura amateka agize utwo duce.

Ni amahugurwa mpuzamahanga yitabiriwe n'abantu 35 bashinzwe imicungire y'Umurage w'Isi baturutse mu bihugu 11 harimo n'u Rwanda. Abanyamahanga ni 21, naho abanyarwanda ni 14.

Inzibutso 4 za Jenoside yakorewe Abatutsi ni zashyizwe mu Murage w'Isi wa UNESCO. Izi nzibutso: urwa Kigali ruri ku Gisozi, urwa Bisesero, urwa Murambi ndetse n'urwa Nyamata.

Umuyobozi w’ishami rishinzwe Kwibuka no kurwanya Jenoside muri Ministeri y’Ubumwe bw’Abanyarwanda n’Inshingano Mboneragihugu, Ingabire Veneranda, yavuze ko kuba izi nzibutso zarashyizwe mu Murage w'Isi bizatuma abazisura biyongera ari nako ibi bizabera isomo Isi yose ngo ibyabaye ntibizongere kuba.

Umuyobozi w'Urwego Nyafurika rushinzwe imicungire y'Umurage w'Isi (Africa World Heritage Fund), Dr. Albino Jopela, avuga ko aya mahugurwa ahanini agamije cyane kongerera ubumenyi abacunga utu duce.

Abitabiriye aya mahugurwa bazarushaho gusobanukirwa bityo nabo bazajye basobanurira mu buryo bunoze abasura utwo duce amateka akomeye arimo na Jenoside yakorewe Abatutsi.