NEC yashimiye abo mu Majyaruguru uko bitwaye mu matora y'Abadepite n'ay'Umukuru w'Igihugu

Komisiyo y’Igihugu y'Amatora, NEC irashimira abaturage b’Intara y’Amajyaruguru kubera uruhare bagize mu migendekere myiza y’amatora ya Perezida wa Repubulika yahujwe n’ay’Abadepite yabaye muri Nyakanga uyu mwaka.

Mu Ntara y’Amajyaruguru ni hamwe mu hagaragaye udushya twinshi ku munsi w’itora ry’Umukuru w’Igihugu nk’aho bateguriye icyayi n’umugati abazindutse kare bajya gutora, ndetse abikorera n’urubyiruko rw’abakorerabushake bakagira uruhare rufatika mu gutunganya site zatorerwagaho.

Guverineri w’Intara y’Amajyaruguru, Mugabowagahunde Maurice we avuga ko kwitabira inshingano mbonergihugu by'umwihariko amatora, bifuza ko byaba umuco mu Banyarwanda.

Perezida wa Komisiyo y'Igihugu y’Amatora, Odda Gasinzigwa ashima cyane uruhare abaturage bagize mu migendekere y’amatora ya Perezida wa Repubulika yahujwe n’ay’Abadepite, akaba yaragaragaje inshingano zabo zo kwitorera abayobozi ariko hakaba harimo isomo by’umwihariko ku rubyiruko.

Mu Ntara y’Amajyaruguru hari site z’itora 460 n’ibyumba by’itora 2,852, naho umubare w’abayituye barenga miliyoni 1.4 nibo batoye Umukuru w’Igihugu n’Abadepite.