Abakorera mu Mujyi wa Rusizi bahangayikishijwe no kutagira aho baparika imodoka

Abatuye n'abakorera mu Mujyi wa Rusizi, baravuga ko babangamiwe no kuba muri uyu Mujyi ntaho guparika imodoka hahagije hahari, ibituma abatwara ibinyabiziga batabona aho babiparika ndetse bikanabangamira urujya n'uruza muri uyu Mujyi.

Umujyi wa Rusizi uratera imbere uko bwije n'uko bukeye dore ko uri no mu yunganira umurwa mukuru, Kigali. 

Nubwo uzamukamo inyubako ndende umunsi ku munsi ariko, bigaragara ko hadatekerezwa ku binyabiziga byinshi nabyo byiyongera aha kuko ntaho ku biparika hahagije haba hateganyijwe.

Ibi bibangamira cyane abakoresha ibinyabiziga, kuko babura aho babiparika mu gihe bakeneye serivisi muri uyu Mujyi.

Si abakoresha ibinyabiziga gusa babangamiwe n'aka kajagari k'ibinyabiziga biba byuzuye inkengero z'umuhanda umwe rukumbi uri muri uyuMmujyi, abanyamaguru bo bavuga ko bishobora no kubateza impanuka.

Uretse kuba mu Mijyi 5 yunganira Umujyi wa Kigali, Umujyi wa Rusizi unaturiye imipaka ya Rusizi 1 na rusizi ya Kabiri ihuza u Rwanda na RDC, bituma urujya n’uruza rw’abantu, ibinyabiziga n’ibicuruzwa byiyongera, ibisaba ko inyubako ziwubakwamo zikwiye kujyana no kureba ku bindi bikorwa abawugendamo bakenera birimo n’ahahagije ho guparika ibinyabiziga.

Pascal NSHIMIYIMANA