Yanditswe Apr, 13 2024 14:57 PM | 183,335 Views
Abanyapolitiki
icyenda barimo abo mu Mujyi wa Kigali no mu ntara zitandukanye bongerewe kuri
12 basanzwe bibukirwa ku Rwibutso rwa Jenoside rwa Rebero. Aba bose bishwe bazizwa
kurwanya umugambi wa Jenoside yakorewe Abatutsi mu 1994.
Iki gikorwa cyabaye kuri uyu wa Gatandatu, tariki ya 13 Mata 2024, ubwo hasozwaga Icyumweru cy’Icyunamo gihuzwa no kwibuka abanyapolitiki bishwe muri Jenoside yakorewe Abatutsi.
Abanyapolitiki 9 bongewe mu bibukirwa ku Rwibutso rwa Jenoside yakorewe Abatutsi rwa Rebero ni Ngulinzira Boniface, Prof Rumiya Jean Gualbert, Dr Habyarimana Jean Baptiste, Ruzindana Godefroid, Dr Gafaransa Théoneste, Ndagijimana Callixte, Nyagasaza Narcisse, Gisagara Jean Marie Vianney na Rwabukwisi Vincent (Ravi).
Umuvugizi w’Ihuriro Nyunguranabitekerezo ry’Imitwe ya Politiki yemewe mu Rwanda, Mukama Abbas, yavuze ko abanyapolitiki bibukwa bishwe bazira ubutwari bwo kwanga ikibi no kurwanya ingoma y’igitugu.
Ati “Ku rutonde rw’abanyapolitiki basanzwe bashyinguye kuri uru rwibutso hiyongereyeho abandi icyenda, na bo baranzwe n’ibikorwa by’ubutwari no kwanga akarengane.’’
Abanyapolitiki bongewe ku rutonde rw’abibukwa rugizwe n’abakozweho ubushakashatsi na Minisiteri y’Ubumwe bw’Abanyarwanda n’Inshingano Mboneragihugu n’abafatanyabikorwa bayo barimo Ihuriro ry’Imitwe ya Politiki yemewe mu Rwanda mu gihe cy’imyaka ibiri.
Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Dr Jean Damascène, yavuze ko batoranyijwe hashingiwe ku bimenyetso birimo inyandiko, imbwirwaruhame, ubuhamya, amashusho yabo n’ibindi.
Yagize ati “Barwanyije Jenoside n’ingengabitekerezo yayo ariko amazina yabo akaba atagaragaraga kuri uru rwibutso rwashyiriweho abanyapolitiki nkabo.’’
Yashimangiye ko abanyapolitiki bibukwa batanze urugero rwo gushyira Ubumwe bw’Abanyarwanda hejuru y’ibindi byose.
Yakomeje ati “Kugaragaza no kumenyekanisha ibikorwa by’indakemwa byabaranze ni intambwe yo gukomeza guhesha icyubahiro politiki nziza, yubaka igihugu ndetse ishimangira ubumwe n’ubudaheranwa bw’Abanyarwanda.”
Yavuze ko buri wese muri bo yaranzwe n’ishyaka, gukunda igihugu no kwimakaza ubumwe bw’Abanyarwanda.
Abana ba Ngulinzira Boniface bashimye ubutwari bwaranze umubyeyi wabo wanazize ibitekerezo bye, banagaragaza inzira y’umusaraba banyuzemo kugeza barokotse, bagahungira mu Bubiligi.
Perezida wa Sena, Dr Kalinda François-Xavier, yavuze ko abanyapolitiki bibukwa bakwiye icyubahiro kuko barwanyije ingoma y’igitugu, banaharanira ubumwe bw’Abanyarwanda.
Ati “Kwibuka aba banyapolitiki ni igikorwa cy’ingenzi kitwibutsa urugero rwiza rwabo mu kwitandukanya n’ikibi no kwanga akarengane mu Banyarwanda.’’
Yagaragaje ko Jenoside itari gushoboka, itarateguwe ngo ingengabitekerezo yayo icengezwe mu mitwe y’abaturage.
Ati “Amashyaka ya politiki n’abanyapolitiki ni bo basenye igihugu bakigeza ku ndunduro ya Jenoside yakorewe Abatutsi yahitanye Abatutsi miliyoni.’’
Yasabye imitwe ya Politiki kubakira ku ndangagaciro zikwiye mu kuganisha Igihugu mu cyerekezo kizima.
Ati “Imitwe ya politiki dufite uyu munsi n’abanyapolitiki bayo bafite inshingano ikomeye yo gukumira no kurwanya ingengabitekerezo ya Jenoside no guharanira iteka ubumwe bw’Abanyarwanda mu bikorwa byabo bya politiki.’’
Igikorwa cyo gusoza Icyumweru cy’Icyunamo cyakozwe hibukwa abanyapolitiki bazize ibitekerezo byabo bashyinguye mu Rwibutso rwa Rebero ruri mu Mujyi wa Kigali.
Imyinshi izafungwa- Umushinga w'itegeko rishya rigenga imiryango itari iya Leta uteye impungeng ...
4 hours
Soma inkuru
Ishyaka PDI ryiyemeje kuzashyigikira Paul Kagame mu matora y’Umukuru w’Igihugu
Apr 28, 2024
Soma inkuru
Zimwe mu mpinduka zagaragaye muri Kaminuza mu myaka 30 ishize
Apr 27, 2024
Soma inkuru
Abanya-Kigali bishimiye kongera gukomorerwa kubaka
Apr 27, 2024
Soma inkuru
Hakiriwe dosiye 4698 z'abaregwa gukoresha nabi umutungo wa Leta mu myaka 5
Apr 27, 2024
Soma inkuru
Imiryango 4800 imaze kwimurwa nyuma y’ibiza byo muri Gicurasi 2023
Apr 26, 2024
Soma inkuru
Minisitiri Gasana yasabye urubyiruko gushikama bagahangana n’abakomeje gupfobya Jenoside
Apr 26, 2024
Soma inkuru
U Rwanda rwifatanyije n'isi mu munsi mpuzamahanga wo kurwanya Malariya
Apr 25, 2024
Soma inkuru