Handball: Ikipe y'Igihugu ya U20 yijejwe gutegurwa neza mu Gikombe cy'Isi

Minisitiri wa Siporo, Nyirishema Richard, yakiriye Ikipe y’Igihugu ya Handball mu Batarengeje imyaka 20 iheruka kwegukana Igikombe cya Afurika, ayizeza ubufasha mu kwitegura imikino y'Igikombe cy’Isi.

Ku mugoroba wo ku wa Kane ni bwo Minisitiri Richard Nyirishema yakiriye ikipe y'Igihugu y'u #Rwanda ya Handball U20  yegukanye Igikombe cya Afurika #IHFTrophy/Continental Phase cyabereye i Addis Ababa muri Ethiopia.

Aba bakinnyi n'abatoza bakigera mu Rwanda babanje gutambagizwa Umujyi wa Kigali bishimira igikombe begukanye, banakimurikira Abanyarwanda.

Minisitiri Richard Nyirishema yashimiye aba bakinnyi uko bitwaye ndetse anabizeza ko bazabafasha kwitegura irushanwa ryo ku rwego rw'Isi, rizahuza amakipe yabaye aya mbere kuri buri mugabane "#IHFTrophy/Intercontinental phase".

Yavuze ko igikorwa bakoze ari icy'ubutwari kuko cyongeye gutuma ibendera ry’u Rwanda rizamurwa.

Yagize ati “Tubashimiye ku byiza mwakoze kuko ni ubwa mbere bibaye. Nabashije gukurikira imikino yanyu mbona mwaratsinze mubikwiye."

Minisitiri Nyirishema yanashimangiye ko uretse kubashimira mu magambo hari n’ibindi bateganyirijwe, anongeraho ko mu gihe bazaba bitegura irushanwa mpuzamigabane bazakomeza kubafasha kubona ibikorwaremezo byo kuryitegura neza.

Ati “Turashaka kumenya neza icyo mwifuza, kugira ngo mwitegure neza irushanwa riri imbere. Niba mwifuza imikino ya gicuti, mubivuze hakiri kare bizadufasha kwitegura ariko nta cyo tuzasiga inyuma, ahubwo tuzakora byose mujye guhagararira u Rwanda neza.”

Umutoza w’Ikipe y’Igihugu y’u Rwanda, Ngarambe François Xavier, yasabye ko bafashwa kwitegura kuko hari akazi gakomeye kabategereje imbere.

Ati “Inzozi zari zimaze kuba nyinshi zo kujya mu Gikombe Mpuzamigabane, twaherukaga kubona umwanya wa gatatu muri iyi mikino. Uyu mwaka twagiye dushaka undi mwanya uri imbere kandi twanyuzwe n'uko gahunda twihaye twayigezeho.”

U Rwanda U20 rwegukanye Irushanwa Nyafurika muri Handball nyuma yo gutsinda imikino yose rwakinnye irimo uwo rwateyemo mpaga Congo-Brazzaville, mbere yo gutsinda Guinea, Zimbabwe n’Ibirwa bya Réunion.

Mugaragu Kuwiteka David