Nyabihu: Barenze ku kwihaza ku musaruro w'ibirayi basagurira amasoko

Yanditswe Nov, 03 2024 19:05 PM | 55,723 Views

Abagize koperative 22 z'abahinzi b'ibirayi mu Karere ka Nyabihu baravuga ko bageze ku rwego rwo kubigemura ku masoko anyuranye mu gihugu, ibi ngo barabikesha imbaraga Leta yashyize mu guteza imbere politiki z'ubuhinzi zabafashije guhinga kinyamwuga.

Ntawizera Anastase, ni umuturage wo mu Murenge wa Jenda, umwe mu yeramo ibirayi mu Karere ka Nyabihu. Anastase avuga ko gahunda za Leta zo kuvugurura ubuhinzi zatumye asarura toni 40 muri buri mwero.

Hirya no hino muri aka Karere harimo gukorwa amaterasi y'indinganire azunganira abaturage kunoza ubuhinzi cyane cyane ubw'ibirayi. Kuri bo ngo ni igisubizo mu kongera umusaruro wabyo.

Aba baturage bavuga ko urwego bagezeho atari urwo kwihaza mu biribwa ahubwo banaranguza ibirayi ku masoko yabyo hirya no hino mu gihugu. Ibi byabaye imbarutso yo gusezerera ubukene mu mu miryango yabo.

Mu karere ka Nyabihu hari amakoperative 22 ahinga ibirayi kuri hegitari zisaga ibihumbi 10. Cumi n'umunani muri izi koperative zikusanya umusaruro woherezwa mu bice by'igihugu. Kugeza ubu kandi muri aka karere hari abatubuzi 94 b'imbuto z'ibirayi ku buryo bifasha abaturage kubona imbuto nziza kandi hafi.

Mu rwego rwo kongera ubuso buhingwaho ibirayi, muri uyu mwaka w'ingengo y'imari, Akarere ka Nyabihu katangiye gutunganya hegitari zisaga 400 z'ubutaka buzagingwaho ibirayi.