U Burasirazuba: RRA yahembye abasora basoze arenga miliyari 48 Frw

Ikigo cy'Imisoro n'Amahoro (RRA), cyashimiye abasora bo mu Ntara y'Iburasirazuba ko mu mwaka w’ingengo y’imari wa 2023-2024 basoze Miliyari 48.3 Frw z’imisoro y’ubutegetsi bwa Leta, ndetse na Miliyari 14 z’imisoro yeguriwe inzego z’ibanze.

Mu Ntara y’Iburasirazuba, Ikigo cy’Imisoro n’Amahoro cyahembye abantu 10 basoze kurusha abandi muri buri Karere, uwishyuye neza imisoro y’inzego z’ibanze, usora watanze facture za EBM nyinshi n’uwazisabye kuri buri kintu cyose yaguze.

Mu mwaka w’ingengo y’imari ushize, abasora bo mu ntara y’Iburasirazuba bari bihaye intego yo kwinjiza Miliyari  56.5 Frw y’imisoro y’ubutegetsi bwa Leta, ariko binjije miliyari 48.3 Frw ni ukuvuga 85.5%. 

Guverineri w'Intara y'Iburasirazuba, Pudence Rubingisa arizeza ko ubu intego bihaye bazayigeraho cyangwa bakanayirenza.

Komiseri Mukuru wa RRA, Niwenshuti Ronald yongeye kwibutsa ko kwaka inyemezabuguzi ari uburenganzira bw’abaguzi n’inshingano z’abacuruzi.

Muri uyu mwaka w’ingengo y’imari wa 2024-2025, abasora bo mu ntara y’Iburasirazuba biyemeje kuzinjiza Miliyari 56.2 z’amafaranga y’imisoro y’ubutegetsi bwa Leta, ndetse na Miliyari zikabakaba 14 Frw z’imisoro yeguriwe inzego z’ibanze.