U Rwanda U20 rwegukanye Irushanwa Nyafurika muri Handball

Ikipe y’Igihugu y’u Rwanda ya Handball mu Cyiciro cy’Abatarengeje imyaka 20 yegukanye Irushanwa Nyafurika, #IHFTrophy, nyuma yo gutsinda Réunion ibitego 34-25.

Umukino wa nyuma w’u Rwanda wabaye kuri uyu wa Gatatu, tariki ya 6 Ugushyingo 2024.

Muri iri Rushanwa Nyafurika, #IHFTrophy, ryaberaga mu Mujyi wa Addis Ababa muri Ethiopia, u Rwanda rwatsinzemo imikino ine yose rwakinnye.

Mu mukino wa nyuma, u Rwanda rwakinnye na Réunion. Rwawutangiye neza aho rwasoje igice cya mbere rufite ibitego 15-12.

Mu gice cya kabiri u Rwanda rwakomeje kwitwara neza ndetse rwawusoje rufite ibitego 34-25.

Nyuma yo gutsinda uyu mukino, u Rwanda rwahise rukatisha itike yo guhagararira Afurika mu irushanwa mpuzamigabane.

Mu bakurikiye uyu mukino harimo Ambasaderi w’u Rwanda muri Ethiopia, Maj Gen (Rtd) Charles Karamba, washimiye abakinnyi b’Ikipe y'Igihugu y'u Rwanda ya Handball y'Abatarengeje imyaka 20.

Muri #IHFTrophy, u Rwanda rwatangiye rutera mpaga Congo-Brazzaville itagereye ku kibuga ku gihe mu mukino wagombaga kubera muri Ethiopian Sports Academy ku wa Gatandatu, tariki ya 2 Ugushyingo 2024. Ikipe y’Igihugu yanatsinze imikino yayihuje na Guinea na Zimbabwe.