U Rwanda rwazamutse imyanya ibiri ku rutonde rwa FIFA

U Rwanda rwazamutse imyanya ibiri ku rutonde rw’Ishyirahamwe ry’Umupira w’Amaguru ku Isi, FIFA, rwerekana uko amakipe y’ibihugu ahagaze. Rwavuye ku mwanya wa 133 rwariho mu kwezi gushize, rugera ku wa 131.

Uru rutonde rwagiye hanze kuri uyu wa Kane, tariki ya 4 Mata 2024, rugaragaza uko ibihugu byitwaye muri Werurwe uyu mwaka.

Ikipe y'Igihugu "Amavubi" yazamutse imyanya ibiri nyuma yo kwitwara neza mu mikino ya gicuti yakinnye. Yanganyije na Botswana 0-0, itsinda Madagascar ibitego 2-0.

Argentine ya Lionel Messi ni yo iyoboye ibindi bihugu ku Isi aho ikurikiwe n’u Bufaransa, u Bubiligi, u Bwongereza na Brésil.

Ku Mugabane wa Afurika, Maroc iri ku isonga, igakurikirwa na Sénégal, Nigeria, Misiri na Côte d’Ivoire.

Igihugu cyazamutse imyanya myinshi [8] ni Indonesia mu gihe Vietnam yamanutse imyanya 10.