U Rwanda rwungutse laboratwari igezweho mu by’ikoranabuhanga rya robots ya miliyoni 100 Frw

U Rwanda rwungutse laboratwari igezweho mu by’ikoranabuhanga rya robots ifite agaciro k’amafaranga y’u Rwanda miliyoni 100, izafasha mu guteza imbere ubumenyi mu ikoranabuhanga.

Inyigo yakozwe umwaka ushize igaragaza ko u Rwanda ruramutse rushoye miliyoni 77 z’Amadorari mu gihe cy’imyaka 5, igihugu cyakunguka miliyoni 500 z’Amadorari ahwanye na 6% by’umusaruro mbumbe w’igihugu.

Kugira laboratwari igezweho nk’iyi yatashywe ku mugaragaro mu Mujyi wa Kigali, ni imwe mu ntambwe yaganisha muri icyo cyerekezo. 

Abanyeshuri bo mu ishuri yashyizwemo bayitezeho kubazamurira ubumenyi.

Mu bijyanye n’icyuho mu by’ubumenyi mu ikoranabuhanga, 34% by’abanyeshuri barangiza amashuri makuru na Kaminuza ni abagore mu gihe 20% bya ba rwiyemezamirimo mu by’ikoranabuhanga ari abagore.

Umuyobozi w’ikigo New Generation Academy, Jean Claude Tuyisenge avuga ko iyi igamije kuziba icyuho mu ikoranabuhanga rya robots.

Umunyamabanga Uhoraho muri Minisiteri y’Ikoranabuhanga na Inovasiyo, Yves Iradukunda avuga ko ishoramari rishyirwa mu bikorwaremezo biteza imbere ikoranabuhanga rizafasha igihugu kugera ku cyerekezo gifite.

Ikoranabuhanga ryitezweho kugeza u Rwanda ku ntego rwihaye yo kuzaba igihugu gifite ubukungu buringaniye bitarenze mu 2035 n’ubukungu buhanitse muri 2050.