Abana b'abakobwa bishyurirwa na FAWE bafite intego yo kwigisha abandi

Gufasha abana b'abakobwa badafite ubushobozi kwiga no kubagira inama z'ubuzima, ni ugushyigikira iterambere ry'igihugu ry'ejo hazaza. Ibi ni bimwe mu byagarutsweho mu biganiro byahuje abana b'abakobwa bafashwa na Fawe Rwanda, baturutse hirya no hino mu gihugu.

Ubukene ni kimwe mu bituma umubare munini w'abana b'abakobwa batabona amahirwe yo gukomeza amashuri yabo ngo bagere aho bifuza kugera. 

Aba bakobwa ahanini baba barabaye indashyikirwa mu mashuri y'icyiciro rusange ariko ntibabone ubushobozi bwo gukomeza mu mashuri kubera amikoro, bavuga ko bishimira kuba barafashijwe kwiga, ndetse nabo bakaba bumva bazaharanira gufasha bagenzi babo, n'igihe bazaba bararangije kwiga.

Gahunda y'imyaka icumi, Fawe Rwanda ifatanyije na Master card Foundation, binyuze mu mashuri 17 y'icyitegererezo mu gihugu, Ifasha abakobwa 1200, baturutse mu mirenge itandukanye babaha ibyangombwa nkenerwa ngo babashe kurangiza amashuri yisumbuye ndetse banakomeze muri kaminuza.