Abantu bose baturutse hanze bazajya bahabwa viza bageze mu Rwanda--'Immigration'

Urwego rushinzwe abinjira n'abasohoka ruravuga ko kuba abanyamahanga bazajya bahabwa visa bageze mu Rwanda, bizatuma umubare w'abagenderera u Rwanda biyongera kurushaho. Abagenda mu Rwanda basanga iki cyemezo kizaborohereza kuko basabaga visa bifashishije ikoranabuhanga bagategereza ko bemererwa bakabona gufata indege.

Ibihugu bisaga 20 birimo n'ibyo mu karere u Rwanda ruhereyemo byemerewe visa y'iminsi 90, ibyo bikajyana n'uko abanyarwanda babijyamo nabo bahabwa iyo visa. Umuvugizi w'ikigo gishinzwe abinjira n'abasohoka Butera Yves asanga kuba bazajya bahabwa visa bakinjira mu Rwanda bizazamura umubare w'abaza mu Rwanda. Yagize ati, "Tugendeye ku cyemezo cyafashwe muri 2013 cyemerera abanyafrika bose gufatira visa ku mupaka, byagize ingaruka nziza ku gihugu kuko abantu bariyongereye: Urugero ni uko kuva 2013 kugeza 2016 abantu biyongereyeho 150%, kuko bavuye ku bihumbi 30 bagera ku bihumbi 70 birenga, ni ikimenyetso kigaragaza ubwiyongere bw'abasura igihugu."

Kuba abanyamahanga baza mu Rwanda bazajya babona visa bakinjira mu Rwanda, bizatangira gukurikizwa kuva ku itariki ya mbere Mutarama umwaka utaha wa 2018, nk'uko bikubiye mu byemezo by'inama y'abaministre yateranye ku itariki ya 8 Ugushyingo uyu mwaka.

Inkuru irambuye mu mashusho: