Polisi icumbikiye abatekamutwe babiri bambura abantu amafaranga

Abagabo babiri bakekwaho kuba mu gatsiko k’abantu bambura abantu amafaranga babizeza inyungu zikomoka ku mushinga wa baringa ugamije guteza imbere abarimu, batawe muri yombi na polisi mu mujyi wa Kigali.

Polisi y’u Rwanda isobanura ko bafatiwe mu murenge wa Remera mu mpera z’iki cyumweru kirangiye bakangurira abarimu n’abandi bakozi bo mu zindi nzego gutanga amafaranga kugira ngo babe abanyamigabane b’Ihahiro ry’Abarimu (Teachers’ Shop) rya baringa; aho ngo bababwiraga ko usibye kubona inyungu iriturukaho; bazajya barifatamo ibintu ku giciro gito.

Abo bagabo bombi ubu bafungiwe kuri sitasiyo ya Polisi ya Remera mu gihe iperereza rikomeje kugira ngo hamenyekane niba hari abandi bambuwe amafaranga muri ubwo buryo.