Madamu Jeannette Kagame yahembye abana b'abakobwa batsinze ibizami bya leta

AGEZWEHO


Madamu Jeannette Kagame yahembye abana b'abakobwa batsinze ibizami bya leta

Yanditswe March, 28 2017 at 16:58 PM | 939 Views



Madamu wa Perezida wa Repubulika Jeannette Kagame avuga ko igihugu cy'u Rwanda kizakomeza gushyigikira abana kugirango bazavemo abanyarwanda b'indashyikirwa bazakomeza agaciro k'igihugu cyabo. Ibi yabivugiye mu karere ka Bugesera mu gikorwa cyo guhemba abana b'abakobwa batsinze neza mu bizami bya Leta bya 2016.

Madamu wa Perezida wa Repubulika Jeannette Kagame yayoboye umuhango wo guhemba abana b'abakobwa 84 batsinze neza kurusha abandi mu bizami bizoza amashuli abanza, icyiciro rusange n'amashuli yisumbuye. Ni umuhango wabereye i Mayange mu karere ka Bugesera, ahari hahuriye abakobwa b'inkubito z'icyeza, biga mu mujyi wa Kigali no mu ntara y'iburasirazuba.

Bahembwe ibikoresho binyuranye by'ishuli, za mudasobwa ndetse n'amafaranga yo gufungura konti zo kwizigama. Mu ijambo rye Madamu Jeannette Kagame yavuze ko abana b' abakobwa batsinze, babikesha umwete wabo ndetse no kuba hari ababashyigikiye,"Tujya gutangira ubu bukangurambaga, intego yari ukugirango dukangurire abana b'abakobwa kujya mu ishuli, bakiga, bagasoza ibyiciro byose, ariko kdi bakaba baba indashyikirwa mu mitsindire. Aba bana b'abakobwa baratwereka yuko wiganye umwete, ukagira intego mu byo ukora byose, nta cyakubuza gutsinda no gutsinda neza. Muri iki gikorwa, nubwo twizihiza abana b'abakobwa batsinze neza, ntitwabashimira bonyine dusize abarimu babo babigisha ubwenge bwo mu ishuli buherekejwe no kubatoza  imyitwarire myiza. Ntitwakwirengagiza kdi intambwe ikomeye imaze guterwa n' ababyeyi bamaze kumva ko abana bose bakwiriye kugana ishuli."

Ku ruhande rw'abanyeshuli bahembwe, bashishikariza bagenzi babo gukora cyane kugira ngo bazagere ku ntego baba bafite.

Igikorwa cyo guhemba abana b'abakobwa bahize abandi mu bizamini bya Leta, umuryango Imbuto Foundation wagitangiye mu mwaka wa 2005. Kugeza ubu hamaze guhembwa abagera ku 4,522, harimo 227 bahembwe uyu mwaka.

Ministeri y'uburezi igaragaza ko n'ubwo mu myaka 12 ishize  gutsinda kw' abana b' abakobwa kwazamutse ndetse akaba ari bo benshi batsinda mu bizamini bya Leta ugereranije na bagenzi babo b'abahungu. Abahungu bakibarusha gutsindira ku manota yo hejuru.



Ba wambere gutanga igitekerezo

Tanga igitekerezo:



RSS FEED

Madamu Jeannette Kagame yasabye urubyiruko kugira icyerekezo mu buzima

First Lady Jeannette Kagame yavuze ko uburezi bushobora guhindura isi

Mme Jeannette Kagame yasabye abayobozi kutajenjekera ibitanya abanyarwanda

Ihuriro rya cumi rya Unity Club Intwararumuri ryibanze ku kubanisha abanyarwanda

First Lady Jeannette Kagame yatanze ikiganiro mu ihuriro rya Global Community

Madamu Jeannette Kagame yatashye inyubako izatuzwamo incike za Jenoside