Gicumbi: Kubura amashanyarazi bituma abaturage bahabwa serivisi mbi ku bitaro

Ikigonderabuzima cya Mukono kiri mu murenge wa Bwisige mu karere ka Gicumbi, gifite ibibazo bikomeye biterwa no kutagira umuriro w’amashanyarazi. Abarwaza ni abarwayi basabwa kwitwaza za 'buji' cyangwa 'amasitimu' kugira ngo bashobore kwitabwaho ninjoro. Battery  z’imirasire y’izuba bafite ngo zarashaje kuburyo zitabika umuriro ndetse no gukoresha imashini itanga amashanyarazi (generator) ngo birabahenda cyane kuburyo batayicana umwanya munini.

Ikigo cya Mukono ni kimwe mu bigo nderabuzima byinshi bidafite umuriro w’amashanyarazi, igaruka z’icyo kibazo zikaba ari nyinshi, zirimo kubura amazi ashyushye yo koga ku babyeyi bamaze kubyara, kudakora ku imashini zakabaye zifashishwa mu kazi k’icyo kigo.

Muri icyo kigo nderabuzima ngo bafite battery z’imirasire y’izuba bifashisha ariko ntizikora neza kubera gusaza. Nkuko byemezwa na Pascal Masengesho, Umuforomo muri iki kigo, izo battery ngo hejuru y’imyaka itanu zari zaragenewe hamaze kurengaho imyaka ibiri, ku buryo n’umuriro ugiyemo iyo bawucanye hashira akanya gato ukaba urashize.

Iki kigo nderabuzima ngo cyakira abarwayi basaga 100 ku munsi.