Musanze: Abujura bwongeye kugaragara nyuma y'igihe kirekire

Bamwe mu baturage batandukanye bo mu murenge wa Muhoza mu karere ka  Musanze baravuga ko bahangayikishijwe n’ubujura bwo mu ngo bwongeye kubura nyuma y’igihe bari bamaze bafite agahenge.

Mu rukerera rwo mu ijoro rya keye, nibwo abajura bateye mu Kagari ka Ruhengeri. Bateye ubwoba abaturage, batangaza ko bakutse imitima nyuma yo kubona uburyo bibye urugo ku rundi; nkuko umwe mu baturage Ndagijimana Jean Paul abisobanura.

Uyu Ndagijimana akomeza avuga ko bishoboka ko abantu baba bamaze kwirara kubera igihe cyari gishize batibwa ku buryo n’undi mugizi wa nabi wese ashobora kubaca mu rihumye akazambya ibintu.

Umugore, utifuje ko amazina ye atangazwa, we avuga ko amafaranga basabwa y’irondo baba bayatangira ubusa mu gihe ryaba ryaradohotse kugeza aho abajura biba ariko ntihagire ubakoma mu nkokora.

Umunyamabanga Nshingwabikorwa w’umurenge wa Muhoza, Sebashotsi Jean Paul avuga ko irondo ritigeze ridohoka ahubwo abo bajura babaciye mu rihumye.

Sebashitsi yahumurije abatuye mu murenge wa Muhoza kudakangaranwa n’ubwo bujura ahubwo abasaba kurushaho gufatanya mu gucunga umutekano bakanatangira amakuru ku gihe.