Umushinga wo kwagura umuhanda wa Nyabugogo watumye 'feu rouge' zidakoreshwa

Uko iminsi igenda ni nako iterambere ridasigara inyuma, ibi bigaragarira no ku binyabiziga byiyongera uko bwije nuko bukeye, mu rwego rwo kugirango hirindwe impanuka hagiye hashirwaho amatara ayobora ibinyabiziga mu ihuriro ry'imihanda hirya no hino mu mujyi wa Kigali.

Gusa kuri ubu usanga hamwe na hamwe aya matara atagikora, aha twavuga nko muri 'Feu Rouge' za Nyabugogo aho bamwe mu bashoferi bagaragaje impungenge zibi aho usanga buri umwe aba ashaka gutanguranwa mu gihe hatari abapolisi babayobora.

Impamvu ibitera ikaba ari uko aha Nyabugogo habarizwa ibikorwa by’ubucuruzi byinshi  bituma haba urujya n’uruza rw’imodoka nyinshi

Umujyi wa Kigali uremeza ko kuba amatara ayobora ibinyabiziga (Feu Rouge) za Nyabugogo zidakora ari ubushake bwabo, mu gihe hategerejwe umushinga wo kwagura iriya mihanda.

Mu kwezi kwa 11 uyu mwaka nibwo hazatangira imirimo yo kwagura imihanda ireshya na 54km hirya no hino mu mujyi wa kigali harimo nuwa nyabugogo, akaba ari umushinga uzamara imyaka 4.