Miliyoni 15 Z'amadolari Niyo Nguzanyo Yahawe U Rwanda Yo Kubaka Umuhanda Rukomo-nyagatare

Kigali. Kuri uyu wa kabiri, leta y'u Rwanda yasinyanye amasezerano y'inguzanyo n'ikigega cya Arabia Saoudite gishinzwe iterambere (Saudi Fund for development) arenga miliyari 11.2 z'amafranga y'u Rwanda. Aya mafaranga azafasha mu bikorwa byo kubaka umuhanda w'ibirometero 73 kuva Rukomo mu karere ka Gicumbi ujya Nyagatare. Ku ruhande rw'u Rwanda aya masezerano yashyizweho umukono na minisitiri w'imari n'igenamigambi Amb. Claver Gatete, naho ikigega cya Arabia Saudite gishinzwe iterambere cyari gihagarariwe n'umuyobozi mukuru wacyo Engineer Hassan Mohammed Al-Attas. Minisitiri w'imari n'igenamigambi avuga ko ikorwa ry'umuhanda Base-Gicumbi-Nyagatare rizagura ubuhahirane ku batuye intara y'iburasirazuba, amajyaruguru n'umujyi wa Kigali. Min Gatete kandi avuga ko igice kinini cy'amafaranga agomba gukora uyu muhanda ari hafi kuboneka binyuze mu bafatanyabikorwa batandukanye harimo na Banki Nyafurika itsura amajyambere. Umuhanda Rukomo-Nyagatare uri mu gice cy'umushinga w'iyubakwa ry'umuhanda Base-Gicumbi-Nyagatare uzaba ufite 124.8Km ugomba gutangira kubakwa mu ntangiriro z'umwaka wa 2017 ukazatwara miliyoni 88.5 z'amadolari ni ukuvuga miliyari 66 Frw. Ukazubakwa ubangikanye n'uwa Kagitumba-Rusumo nawo wamaze kubonerwa amafaranga byitezwe ko niyuzura izahindura byinshi mu bucuruzi no koroshya ingendo muri rusange.