Abagura ubutaka bagiriwe inama yo gushishoza kugira ngo batazagwa mu bihombo

Bamwe mu baturage baguze ubutaka mu buryo bwemewe n’amategeko, baratangaza ko babangamiwe n’ibibazo biterwa na bamwe mu bantu babashora mu manza zitari ngombwa. 

Baravuga ko ibi ngo bikunze kuba nyamara uwaguze n'uwagurishije baba barabikoze imbere y’inzego z’ibifitiye ububasha, ariko nyuma hakaza abandi biyitirira iyi mitungo bikarangira bayisubijwe.

Veneranda Uwimana umuturage mu karere ka Nyarugenge, yaguze ubutaka burimo inzu buherereye mu murenge wa Nyamirambo mu karere ka Nyarugenge mu 2012.

Mu kugura uyu mutungo yabanje gushishoza anyura mu kigo cy’igihugu gishinzwe imicungire n’imikoreshereze y’ubutaka, ndetse no mu nzego zibanze asanga uyu mutungo nta kibazo ufite ndetse utanagaragaza ko ari umutungo w’izungura.

Nyir’umutungo wari ufite icyangombwa cy’ubutaka cyimwanditseho wenyine, bajya kwa Notaire wemewe n’amategeko bahererekanya ubutaka bushingiye ku bugure ndetse uwaguze ahabwa icyangombwa cy’ubutaka bumwandikwaho.

Nyuma ariko haje kuvuka ikibazo cy’uko uwagurishije ubutaka yari afite abo bavukana, biba ngombwa ko bitabaza inkiko zitegeka ko umutungo usubira mu maboko y’abazungura

Kuri ubu Veneranda Uwimana waguze uyu mutungo ku mafaranga miliyoni zikabakaba 18 Frw, avuga ko ari mu gihirahiro kuko inkiko zamutegetse  gusubiza ubutaka agukurikirana uwawumugurishije kandi nawe yibera mu gihugu cya Canada.

Iki ni ikibazo uyu Veneranda ahuriyeho n’abandi barimo abatuye mu Murenge wa Kigali, bagaragaza ko mu ihererekanya ry’ubutaka rishingiye ku bugure hashobora kuba hanugwanugwamo ruswa kuko n’abashakanye, umwe muri bo agurisha ubutaka undi atabizi kandi ihererekanya rishingiye ku bugure  rigakorwa.

Ikigo cy’igihugu cy’imicungire n’imikoreshereze y’ubutaka, kigaragaza ko ihererekanya ry’ubutaka ririmo irishingiye ku bugure, ku mpano, ku izungura n’irishingiye ku irage.

Iki kigo kigaragaza ko iyo havutse ikibazo cy’uko umuntu yagurishije umutungo uhuriweho n’umuryango, hakabamo abavuga ko bwagurishijwe batabizi  habaho kwitabaza inkiko, rimwe na rimwe zitegeka ko uwaguze asubiza ubutaka agakurikirana uwamugurishije.

Ngo birashoboka ko yagaragariza umucamanza inyungu afite kuri ubwo butaka zirimo amafaranga yatanze, bukaba bwaba buhagaritswe ngo butagurishwa.

Umuyobozi mukuru w’iki kigo Esperance Mukamana asaba inzego z’ubuyobozi n’abaturage kujya bashishoza mu guhererekanya ubutaka.