Abamugariye ku rugamba bubakiwe umuhanda

Abamugariye ku rugamba batuye mu Mudugudu wa Mukoni, Umurenge wa Nyarugunga w'Akarere ka Kicukiro bishimira ko umuhanda wa kaburimbo n'utuyira tujya mu ngo zabo bubakiwe n'abaturage bigiye koroshya imigenderanire.

Aba bamugariye ku rugamba batuye bavuga ko bari babangamiwe n'uko inzira zijya mu ngo zabo zari zarangiritse bigatuma amagare bagenderamo nayo yangirika. Bashima abatuye muri uyu Mudugudu bishatsemo ibisubizo bagakusanya amafaranga yo kububakira umuhanda wa kaburimbo wa metero 80 ndetse n'utuyira tujya mu ngo zabo bakoresheje amapave. Aba bamugariye ku rugamba bahamya ko bigiye koroshya imigenderanire hagati yabo n'abaturanyi.

Abatuye muri uyu Muduguduwa Mukoni babikoze bafatanyije n'abanyeshuri bo mu kigo cy'amashuri yisumbuye cya Green Hills Academy, mu rwego rwo gushimira abamugariye ku rugamba ubwitange bwabo mu kubohora igihugu.

Ubuyobozi bw'akarere ka Kicukiro bushima iki gikorwa cy'indashyikirwa cy'aba baturage kuko ngo bigaragariza abamugariye ku rugamba ko umuryango nyarwanda ubaha agaciro. Dr Nyirahabimana Jeanne uyobora aka karere ashimangira ko bazakomeza gushyikira ibikorwa nk'ibi.

Urubyiruko narwo rwashimiye abamugariye ku rugamba ku bw'uruhare bagize mu kubohora igihugu bagenerwa n'ibiribwa ndetse n'ibikoresho bibafasha mu rugo.

Uyu muhanda wa Kaburimbo ufite uburebure bwa metero 80 ushamikiweho utundi duhanda tw'amapave tujya mu ngo z'aba bamugariye ku rugamba zigera kuri 16. Ibi bikorwa byose byatwaye miliyoni 6 n'ibihumbi bisaga 7 z'amafaranga y'u Rwanda yakusanijwe mu baturage n'aba bafatanyabikorwa hatabariwemo ibikorwa by'umuganda.

<iframe width="560" height="315" src="https://www.youtube.com/embed/xWPLRSYAwok" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>

Inkuru ya Jean Paul TURATSINZE