Abanyerondo, abasekirite n’abashoferi, ibyiciro byakingiwe COVID19

Kuri iki Cyumweru mu bikorwa byo gukingira ibyiciro bitandukanye hakingiwe abashinzwe umutekano bo muri Kompanyi zigenga, abanyerondo, n'abashoferi b'amakamyo na za bus bose hamwe barenga ibihumbi 4000.

RBC ikangurira ababonye urukingo rwa mbere gukomeza gukaza ingamba zo kwirinda mu gihe batarabona urwa kabiri kuko hari igihe umubiri uba utarubaka ubudahangarwa buhagije.

Hirya no hino ku nyubako zihuriramo abantu benshi ahatuye abantu, uhasanga inzego zishinzwe umutekano ziri mu ma kompanyi atandukanye yigenga aho usanga ziri mu bikorwa bitandukanye byo gukunga umutekano.

Ni abantu bahura n'abantu benshi batandukanye, ibintu bishobora gushyira ubuzima bwabo mu kaga mu kandura no kwanduza COVID19.

Kuri uyu munsi abo basekite bo muri kampani zitandukanye zigenga, abanyerondo, abashoferi b'amakamyo n'imodoka zitwara abantu mu buryo bwa rusange bakingiwe covid19 bemeza ko uru rukingo rugiye kubafasha mu bwirinzi, mu gihe bari mu kazi kabo ka buri munsi.

Umuyobozi ushinzwe kurwanya ibyorezo mu kigo cy'igihugu gishinzwe ubuzima RBC Dr Rwagasore Edison avuga ko ibi byiciro na byo biri mu byatoranijwe kubera ko abacunga umutekano bari mu bantu bahura n'abantu benshi bashobora kuba bakwanduzanya. Anasaba abantu gukomeza ingamba zo kwirinda covid19 mu gihe batarabona urukingo rwa kabiri.

Yagize ati ''Ni icyiciro kigezweho kubera y'uko ari abantu bakora umwuga usaba ko baahura n'abantu benshi kandi abantu bashobora guhura nabo bashobora nabo kuba bafitemo ubwandu niyo mpamvu bahiswemo mu byiciro bya mbere ariko n'ibindi byiciro bizagerwaho. Ubutumwa natanga ni uko abantu bakwiye gukomeza ingamba zo kwirinda kuko n'iyo waba ukingiwe ntabwo biba bivuze y'uko uba wamaze kubaka ubwirinzi buhagije bw'umubiri kuba wakirinda ubwawo, bivuze y'uko nubwo bwose wakingirwa bisaba y'uko ukomeza kwambara mask gukomeza n'izindi ngamba zose yaba ari ugukaraba intoki no guhana intera kugira ngo utazandura kandi waramaze kubona urukingo rwa mbere.''

Abashinzwe umutekano bari muri Kampani zigenga cyangwa se abasekirite bakingiwe kuri uyu munsi barenga 1500, abashoferi b'amakamyo n'amabisi 751, n'abanyerondo 2000.

Bienvenue Redemptus