Bamwe mu baturage n'abacuruzi bishimiye igabanuka ku giciro cy'amashanyarazi

Abanyarwanda b'ingeri zitandukanye bishimiye ko gahunda yo kugabanya igiciro cy'umuriro w'amashanyarazi yatangiye gushyira mu bikorwa kuva ku itariki ya mbere. Ibi bishyizwe mu bikorwa nyuma y'uko inzego zishinzwe ingufu z'amashanyarazi zigaragaje ko ibikorwaremezo bitanga umuriro w'amashanyarazi byiyongereye.

Ibyishimo nkibyo byanagaragajwe n’abakora ubucuruzi bunyuranye harimo abakora muri za saloon bakaba bemeza ko gahunda za leta  ''imvugo ariyo ngiro''.

Ishyirwa mu bikorwa rya gahunda yo kugabanya igiciro cy'umuriro w'amashanyarazi mu Rwanda, rije nyuma y'uko mu kwezi gushize ministeri y'ibikorwa remezo n'ikigo gishinzwe ingufu REG bagaragaje ko hari kugenda huzura ibikorwa remezo byinshi bitanga umuriro w'amashanyarazi. Icyo gihe ministre James Musoni w'ibikorwa remezo yasobanuye ko muri iki giciro umuturage yitaweho cyane.

Kuva muri uku kwezi kwa mbere, biteganyijwe ko ikigo cy’ingufu REG kitangiza gahunda yitwa PIP igamije kunoza imitangire ya serivisi ijyanye no kugeza umurimo w'amashanyarazi ku baturage.