DRC igiye gufatanya n'abaturage mu kurwanya imitwe yitwaje intwaro

Ibihugu by’u Rwanda na Repubulika Iharanira Demokarasi ya Kongo biratangaza ko imitwe yitwaje intwaro muri Repubulika iharanira Demokarasi ya Kongo itazakomeza kwihanganirwa, kandi ko n'abaturage bakwiye kumva ububi bw'ibikorwa byayo muri icyo gihugu n'ingaruka igira ku Rwanda.

Ibi intumwa z’ibihugu byombi zabitangarije mu nama yazihurije i Kigali kuri uyu wa Mbere

Ni inama yo mu rwego rwa tekiniki, abagize Komisiyo z'impande zombi baganiriye ku myitwarire y'iyo mitwe n'ibibazo iteza mu tuce iherereyemo.

Umuhuzabikorwa wa Komisiyo mpuzaturere igamije kwambura intwaro no gusubiza mu buzima busanzwe abahoze ari abarwanyi, Clovis MUNIRHE avuga ko nyuma y'urupfu rw'uwari umuyobozi wa FDLR, Sylvestre Mudacumura, hagomba kongerwa mu bikorwa byo guhashya imitwe yitwaje intwaro bikajyana n'ibikorwa by'ubukangurambaga kugira ngo abaturage bareke gukorana n'iyo mitwe kuko idindiza iterambere n'amahoro arambye.

Yagize ati ''Nk'uko mubizi, uko ibibazo by'umutekano bihagaze muri Repubulika Iharanira demokarasi ya Kongo, bigira ingaruka ku Rwanda. N'ubwo Mudacumura yapfuye, ariko hari n'abandi, nkaba nkeka ko ibintu bizagenda neza, ariko na none ari na  ho nshingira nsaba ko inzego zirebwa n'iki kibazo ku mpande zombi zakwihutisha ibikorwa byo kurandura burundu umutwe wa FDLR. Ikindi kigomba kandi cyatanga igisubizo kirambye ni ukwegera abaturage no kubumvisha uruhare rwabo.''

Perezida wa Komisiyo yo gusezerera no gusubiza mu buzima busanzwe abahoze ari abasirikare, Séraphine Mukantabana avuga ko hashingiwe ku bushake bw'abakuru b'ibihugu ndetse n'akazi komisiyo ishinzwe iki kibazo muri DRC ikora, bitanga icyizere cyo kurangiza burundu ikibazo cya FDLR.

Yagize ati ''Ikigaragara, kubera ubushaka bw'abakuru b'ibihugu byombi, ubu ikibazo cyarahagurukiwe. Umusaurro tubona twawubonye, mbere wabonaga ko abayobozi babo bavugaga ibintu bisa n'ibirimo imbereka, bidafashe. Ariko ubu ibintu birafatika. Ikindi dushima ni uko bashaka kubifatanyamo n'abaturage (Approche communautaire), gufatanya n'abaturage kumvisha abari mu mitwe yitwaje intwaro ku bayivamo, aba FDLR bakabereka inzira zitaha iwabo. Abashaka kugira imitwe ikomeye bazaraswa, hari ababizobereye bazabarasa.''

Komisiyo mpuzaturere igamije kwambura intwaro no gusubiza mu buzima busanzwe abahoze ari abarwanyi muri Repubulika Iharanira Demokarasi ya Kongo mu bushakashatsi yakoze, yagaragaje ko mu burasirazuba bw'icyo gihugu habarurwa imitwe yitwaje intwaro isaga 100. 

Iyo mitwe ikunze kugaragara mu mashyamba no mu duce ducukurwamo amabuye y'agaciro, igahoza ku nkeke ikanica abaturage baho no gufata ku ngufu abagore bo muri icyo gihugu.

Komisiyo yo gusezerera no gusubiza mu buzima busanzwe abahoze ari abasirikare mu Rwanda ivuga ko mu myaka 22 imaze igiyeho yacyuye inasubiza mu buzima busanzwe abarwanyi basaga gato ibihumbi 12.

Inkuru mu mashusho

<iframe width="560" height="315" src="https://www.youtube.com/embed/W5KABt3J_pk" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>