GEN. CHAMPION YASUYE ABAPOLISI B’U RWANDA BARI MURI CAR

General Pascal Champion, Umuyobozi mushya wa Police ihuriweho n’Ibihugu bibungabunga amahoro mu gihugu cya Central Africa yasuye abapolice b'u Rwanda bari muri iki gihugu mu butumwa bwa LONI, aho baherereye i Bangui; kuri iki Cyumweru.

Uru rugendo rwe ruri muri gahunda afite yo kugenzura no gusura abapolisi ayoboye bose, kugira ngo amenye imikorere yabo n’ubushobozi bafite ndetse no kugezwaho imbogamizi baba bafite muri ubu butumwa bwo kubungabunga amahoro.

Gen. Pascal Champion yatangiye imirimo mishya ku wa 12 Werurwe, asimbuye Gen. Roland Zamora, warangije manda ye muri Nyakanga umwaka ushize.

Ubwo yageraga ahari abapolisi b’u Rwanda, Gen. Champion yakiriwe na Assistant Commissioner of Police Damas Gatare wamusobanuriye imikorere yabo n’imbogamizi bahura nazo kuva bahagera, mu Kuboza umwaka ushize.

Gen. Champion nawe yabashimiye ubwitange bwabo, avuga ko ari ubwa mbere agiye gukorana nabo, ariko ko yishimira ko bakomeje kugaragaza umurava mu mikorere yabo, anabizeza ubufatanye mu gukemura ibibazo bamugaragarije bijyanye n’aho baba n’ibikorwaremezo.

Kuri ubu abapolisi basaga 450 b’u Rwanda nibo bari muri iki gihugu; aho u Rwanda rwatangiye kubungabungayo amahoro kuva mu 2014.