Gatsibo: Umuntu umwe muri babiri aba arwaye Malaria

Hashize iminsi abatuye uturere twa Gatsibo na Nyagatare bataka ko indwara ya Malaria yiyongereye ugereranije no mu bihe byashize, ibi  bikaba binagaragazwa n\'imibare y\'abagana Poste de Sante n\'ibigo  nderabuzima byo muri utu turere bayisuzumisha.

Ikigo nderabuzima cya Kageyo, giherereye mu murenge wa Kageyo mu karere ka Gatsibo. Abagituriye bemeza ko indwara ya Malaria  yiyongereye koko, ibi ngo bakaba babibonera mu ngo zabo  n\'abaturanyi bahora bayirwara.

Nkuko bigaragazwa n\'impuguke mu byubuzima, kugira ngo umuntu  arware Malaria  ni uko aba yarumwe n\'umubu  wabanje kuruma  uyirwaye ukamwanduza mu maraso agakoko kayitera bita plasmodium.  Aba baturage bo mu murenge wa Kageyo, bavuga ko ntako batagira ngo ingamba zose zo kwirinda Malaria bazishyire mu  bikorwa, ariko ngo ntibumva impamvu ikomeza kwiyongera.

Ubusanzwe ikigo nderabuzima cya Kageyo cyakira abarwayi bari hagati ya 80 na 100 ku munsi. Imibare igaragazwa n\'Iki kigo yerekana ko kuva mu kwezi kwa 12 umwaka ushize wa 2015 kugera mukwa 2 uyu mwaka, bakiriye abarwayi 3947 bari barwaye Malaria, mu gihe kuva mu kwezi kwa 12 kumwaka wa 2014 kugera mukwa 2 k\'umwaka wa 2015 bakiriye abarwayi ba Malaria 277 gusa. Ibi bisobanuye ko mu gihe cy\'umwaka umwe gusa abarwayi ba Malaria biyongereye bikabije, kuko nibura umwe muri 2 bakira aba ayirwaye.

FRANCINE UMUTESI