I Kigali harabera inama ya 5 y’ihuriro ry’abaperezida b’inkiko z’ikirenga muri EAC

Guhera kuri uyu wa Mbere, i Kigali hateraniye inama y’iminsi itatu y’Ihuriro ry’Abaperezida b’Inkiko z’Ikirenga na Komite y’Uburezi mu butabera mu Muryango w’Afurika y’Iburasirazuba muri Afurika y’Iburasirazuba.

Insanganyamatsiko yayo ni Uruhare rw’Ubucamanza mu guteza imbere iyubahirizwa ry’amategeko n’ubutabera bushingiye ku bidukikije hagamijwe amajyambere arambye muri Afurika y’Iburasirazuba.

Abagize ihuriro ry’Abaperezida b’Inkiko z’Ikirenga bazibanda ku izahurwa ry’ibikorwa by’iri huriro mu bihugu bigize Umuryango w’Afurika y’Iburasirazuba bagira uruhare rugaragara mu kwishyira hamwe nyako kw’ibihugu byo mu Karere.

Iri huriro kandi rizarebera hamwe aho ibyemezo n’imyanzuro by’inama iheruka bigeze bishyirwa mu bikorwa.

Imyinshi mu myanzuro yagiye ifatwa ijyanye n’uburyo bwo kurushaho kwegereza abaturage ubutabera no guteza imbere ubuyobozi bugendera ku mategeko mu bihugu bigize Umuryango w’Afurika y’Iburasirazuba.

Abitabiriye inama y’Ihuriro ry’Abaperezida b’Inkiko z’Ikirenga mu Muryango w’Afurika y’Iburasirazuba bitezweho kandi kwita ku byemezo byagiye bifatwa mu gushyira mu bikorwa ibyemezo by’Intumwa Nkuru za Leta zo muri ibi bihugu, hagamijwe guteza imbere amategeko cyane cyane ku birebana na gahunda yo kwishyira hamwe kw’ibihugu.