INTEKO YANYUZWE N'IBISOBANURO BYA MINISITIRI SORAYA

Inteko rusange - Umutwe w'Abadepite yanyuzwe n'ibisobanuro Minisitre  yayigejejeho ku bibazo yari yabajijwe mu nyandiko, byagaragajwe muri raporo ya komisiyo y'ubuhinzi, ubworozi n'ibidukikije ubwo yasesenguraga ibibazo bibangamiye ubucuruzi n'inganda hirya no hino mu gihugu.

Ministre w'Ubucuruzi n'Inganda Hakuziyaremye Soraya, yasobanuriye inteko rusange umutwe w'abadepite ku bibazo 23 yagaragararijwe anerekana ingamba n'igihe cyo kubikemura. Ibyinshi birarebana n'imikorere n'imikoranire y'inganda n'abahinzi n'umusaruro wangirika.

Abadepite bagaragaje ko hari ibindi bikwiye kugaragazwa cyane cyane birebana n'imikorere y'inganda.

Kuri iki cy'inganda, Ministiri Hakuziyaremye yagaragaje ko abafite inganda zitujuje ubuziranenge batangiye kwegerwa kugira ngo bahabwe ubumenyi naho ku kijyanye n'inganda zikora ibyo gupfunyikamo ngo haracyashakwa abashoramari

Minisitiri w'ubucuruzi n’inganda yari yatanze ibisobanuro mu magambo ku itariki ya 07 z'ukwezi gushize, ariko icyo gihe inteko rusange ntiyanyurwa, ifata umwanzuro wo kumusaba kuzatanga ibisobanuro mu nyandiko, byaje kunyura izi ntumwa za rubanda.

Inkuru ya John BICAMUMPAKA