Itsinda ry’Abofisiye b’abanyeshuri mu ishuri rikuru rya gisirikare rya Nigeria batangiye urugendo shuri mu Rwanda

Itsinda ry’abofisiye b’abanyeshuri mu ishuri rikuru rya gisirikare rya Nigeria bari mu Rwanda mu rugendo shuri, rikaba rigizwe n’abasirikare 42 bayobowe na Brig Gen Ibrahim Bindul.

Kuri uyu wa Mbere basuye Icyicaro gikuru cy’ingabo z’igihugu aho bahawe ikaze bagezwaho ikiganiro kibanze ku rugendo rwo kwiyubaka kw’ingabo z’u Rwanda.

Brig Gen Ibrahim Bindul yavuze ko aba basirikare bakuru bari mu bushakashatsi bwibanda ku mibereho n’iterambere, ndetse n’umutekano ku mugabane wa Afurika.

Aba ba Ofisiye baturutse muri Nigeria kuri uyu munsi bunamiye inzirakarengane zazize Jenoside yakorewe Abatutsi mu Rwanda, ku rwibutso rwa Kigali hanyuma banasuye Ingoro y’Amateka y’urugamba rwo guhagarika Jenoside.

 Mu gihe cy’icyumweru bazamara mu Rwanda, bazagezwaho imikorere y’imishinga itandukanye ifasha ingabo z’u Rwanda ku bijyanye n’imibereho myiza y’abasirikare harimo Zigama CSS, MMI n’Ibitaro bya Gisirikare ndetse bazasura n’izindi nzego za Leta.