Kaminuza y'u Rwanda yavuguruye intego yari yarihaye kugeraho mu myaka 7

Ubuyobozi bwa Kaminuza y'u Rwanda bwavuguruye intego bwari bwarihaye mu myaka 7 kuva muri 2018-2025.

Ni mu rwego rwo kureba ibyagezweho mu myaka 3 ndetse no gushaka umuti wa bimwe mu bibazo iyi kaminuza yahuye na byo birimo ibyatewe no gushegeshwa n'icyorezo cya COVID19.

Mu biganiro byahuje iyi kaminuza n'izindi nzego za Leta zitandukanye n'abikorera basanga hari ibyo iyi kaminuza yanoza kugira ngo irusheho kuba icyitegererezo mu ruhando mpuzamahanga.

Umuyobozi Mukuru wungirije ushinzwe iterambere n'icyerekezo cy'iyi kaminuza, Dr Musafiri Papias Malimba avuga ko muri iyi myaka ine isigaye kugira ngo intego bihaye zibe zagerwaho hari ibyo bagiye gushyiramo imbaraga aho hakenewe ingengo y'imari y'amafaranga asaga miliyari  346.

Iyi kaminuza ikaba ikeneye abafatanyabikorwa bayifasha kugera ku ntego zayo.

Kaminuza y’u Rwanda ifite koleje 6 zikagira amashami 22 hirya no hino mu gihugu ikaba ifite abanyeshuri bagera ku bihumbi 30.