Kamonyi: Abaharokokeye Jenoside barashima ubutabera bwahannye Jean Paul Akayesu

Yanditswe Apr, 19 2022 19:14 PM | 61,419 Views

Umubyeyi witwa Mukambanda Victoire warokokeye Jenoside yakorewe Abatutsi mu Murenge wa Rukoma mu karere ka Kamonyi, avuga ko ashimishijwe n’ubutabera bwatanzwe n’urukiko rwa Arusha mu rubanza rwa Akayesu Jean Paul ku cyaha cyo gufata abagore ku ngufu mu gihe cya jenoside yakorewe abatutsi.

Uyu Murenge wa Rukoma ni wo wahoze ari Komine Taba mu 1994 ikaba yarayoborwaga na burugumesitiri Akayesu Jean Paul uzwi cyane ku ruhare yagize muri jenoside yakorewe Abatutsi muri aka gace, byanatumye akatirwa igifungo cya burundu na TPIR urukiko rwakoreraga Arusha muri Tanzania.

Umwe mu batanze ubuhamya mu rubanza rwa Akayezu ni Mukambanda Victoire, avuga ko ashimishwa no kuba ijwi rye na bagenzi be ryarahawe agaciro muri uru rukiko by’umwihariko ku cyaha cyo gufata abagore ku ngufu.

Mukambanda Victoire avuga ko ashimishwa no kuba mu mategeko mpuzamahanga icyaha cyo gufata abagore ku ngufu cyaravanwe mu cyiciro cya kane kigashyirwa mu cya mbere ku bw’ijwi rye na bagenzi be, bajyanye gutanga ubuhamya mu rukiko mpuzahanga mpanabyaha rwa Arusha.

Kuri uyu wa 19 Mata ni bwo umurenge wa Rukoma utegura igikorwa cyo kwibuka jenoside yakorewe Abatutsi.

Iyi tariki ni umwihariko w’aka gace kuko ari bwo jenoside yakorenwe ubukana bukabije, nyuma y’amabwiriza abakayoboraga bavanye mu nama bitabiriye kuri perefegitura ya Gitarama ahatangiwe amabwiriza.

Tariki 19 Mata 1994 hazirikanwa cyane Abatutsi biciwe ku kirombe cya Cyatenga mu kagari ka Remera ahacukurwaga amabuye y’agaciro.

Nsengiyumva Emmanuel warokokeye muri iki kirombe avuga nko abifata nk’igitangaza cyo kuzuka, kuko nta mbaraga za muntu zari kumukura mu bujyakuzimu bwa metero zibarirwa muri 50.

Muri rusange abarokotse jenoside yakorewe Abatutsi muri uyu murenge wa Rukoma bishimira intambwe imaze guterwa mu guhangana n’ingaruka z’aya mateka, kimwe no kwiyubaka mu rwego rw’ubumwe n’ubwiyunge.

Ubuyobozi buvuga ko abafatanyabikorwa babifitemo uruhare muri gahuda zinyuranye zihuza abarokotse jenoside yakorewe abatutsi n’ababayigizemo uruhare, bakunganira izindi gahunda za leta harimo n’iya ndi umunyarwanda.