Ku nshuro ya mbere mu mezi 3 ku isoko ry'imari n'imigabane hakusanyijwe arenga miliyari 130 Frw

Ku nshuro ya mbere, ku isoko ry'imari n'imigabane hakusanyijwe arenga miliyari 130 Frw mu gihe cy'amezi 3, binyuze mu bucuruzi bw'impapuro mpeshamwenda.

Byagaragaye ubwo ikigo Prime Energy cyashyiraga ku isoko, impapuro mpeshamwenda zizwi nka "Green Bonds" za miliyari 9,5 Frw mu gihe myaka 7.

Abashoramari babaye benshi mu kugaragaza ubushake bwo kugura izi mpapuro za sosiyete Prime Energy kuko hari hakenewe miliyari 9,5 Frw, ariko abiyandikishije barengeje miliyari 9,580 Frw, bivuze ko amafaranga yarenzeho, bagomba kuyasubiza banyirayo.

Ubu bwitabire bwagaragaye bwaje busanga umubare munini w'abashoramari bari babanje kugaragaza ubushake bwo kugura izindi mpapuro mpeshwamwenda ziri ku isoko nk'uko byasobanuwe na Pierre Celestin Rwabukumba, umuyobozi w'isoko ry'imari n'imigabane.

Umuyobozi mukuru ushinzwe iby'isoko ry'imari n'imigabane n'ibikorwa by'ishoramari muri Minisiteri y'Imari n'Igenamigambi, Biganiro Steven asobanura ko kwitabira kugura izi impapuro mpeshamwenda ari icyizere ku bukungu bw'igihugu.

Impapuro mpeshamwenda zizwi nka Green Bonds, nibwo bwa mbere zicurujwe ku isoko ry'imari n'imigabane hano mu Rwanda.

Sosiyete Prime Energy ikora ubucuruzi bw'amashanyarazi, yashyize ku isoko izi mpapuro ikeneye kubaka uruganda rushya rw'amashanyarazi rwa Rukarara ya 4, ku mugezi wa Rukarara uherereye mu Karere ya Nyamabagaye.

Placide Ngirinshuti