Minisitiri w'Intebe Dr Ngirente yitabiriye umuhango wo gusezera Magufuli

Kuri uyu wa Mbere, Minisitiri w’Intebe Dr. Edouard Ngirente yahagarariye u Rwanda mu muhango wo gusezera bwa nyuma Perezida Dr. John Pombe Magufuli witabye Imana mu cyumweru gishize, azize uburwayi bw’umutima.

Mu ijambo yagejeje ku bitabiriye uwo muhango, Dr Ngirente yashimangiye ko u Rwanda rukomeje gufata Tanzania mu mugongo muri ibi bihe bitoroshye.

Muri rusange iki gikorwa cyo gusezeraho bwa nyuma nyakwigera John Pombe Magufuli cyitabiriwe n’abakuru b’ibihugu babarirwa mu 10 b’Afrika n’abandi banyacyubahiro batandukanye. bavuze ko nyakwigendera president John Magufuli batazamwibagirwa na rimwe.

Nka Perezifa wa RDC, Félix Tshisekedi unayoboye umuryango w’Afrika yunze ubumwe muri iki gihe yavuze ko RD Congo iri mu masengesho kandi yifatanyije n'Abatanzania.

Perezida Filipe Nyusi wa Mozambique nawe yavuze ko Magufuli azahora mu mitima ya benshi.

Perezida Cyril Ramaphosa wa Afurika y'Epfo we yavuze ko nyakwigendera Perezida Magufuli yari umukuru w’igihugu ukunda igihugu cye n’Afrika bya nyabyo. Yongeyeho ko igihugu cye cyatangiye kwigisha Igiswahili kubera umuhate wa Magufuli kugira ngo uru rurimi rukoreshwe.

Nyuma yo gusezerwaho i Dodoma umurambo wa Magufuli uzajyanwa gusezerwaho muri Zanzibar, na Mwanza mbere yo gusezerwaho bwa nyuma no gushyingurwa aho akomoka hitwa Chato mu majyaruguru ya Tanzania. Azashyingurwa tariki 25 z’uku kwezi kwa 3.