Mu rwibutso rwa Jenoside rwa Mugina muri Kamonyi hashyinguwe imibiri 108

Kuri uyu wa kabiri, ku rwibutso rwa Jenoside yakorewe Abatutsi rwa Mugina mu karere ka Kamonyi hashyinguwe imibiri 108 y’abishwe muri jenoside yakorewe Abatutsi. 

Abayobozi batandukanye batanze ubutumwa buhumuriza abarokotse jenoside yakorewe Abatutsi, ariko hashimangirwa ingigo y’ubumwe n’ubwiyunge.

Tariki 25 na 26 Mata 1994, ni iminsi ishaririye mu mateka ya Mugina kubera ibitero byahitanye umubare munini w’Abatutsi bari bakohakoraniye. 

Ubu urwibutso ruruhukiyemo abagera ku bihumbi 59.095.

Mu kwibuka kuri iyi nshuro ya 28 hakaba hashyinguwe imibiri 108 barimo 37 babonetse mu Murenge wa Mugina, na 71 babonetse mu wa Nyamiyaga.

Gahigi Athanase watanze ubuhamya ku nzira yanyuzemo ahigwa, ariko amaze kurokoka atangira inzira yo kwiyubaka n’ubu akaba ashima leta y’u Rwanda by’umwihariko ingabo zari iza RPA zabigizemo uruhare ndasimburwa. 

Uyu mugabo avuga KO mu kwiyubaka kwe atasigaye inyuma mu rwego rw’ubumwe n’ubwiyunge, aho Asaba abarokotse jenoside yakorewe abatutsi ku mushyigikira muri uru rugendo.

Kwibuka ku Mugina ni igikorwa gihuza abaturage muri rusange n’abayobozi mu nzego zitandukanye, bagafata mu mugongo abarokokeye ku Mugina. Guverineri w’Intara y’Amajyepfo, Kayitesi Alice ahumuriza abarokotse jenoside yakorewe Abatutsi muri rusange, ariko akabasaba kuvoma imbaraga z’ubwiyunge mu murongo mugari w’imiyoborere y’igihugu.

Ubundi butumwa butangwa mu batuye umurenge wa Mugina, ni ubwo gutanga amakuru y’ahaba hakiri imibiri y’abishwe muri jenoside yakorewe abatutsi kugira ngo ishyungurwe.

Ibi birashingira ku kuba akenshi imibiri ishyingurwa iboneka kubera ibikorwa cyane iby’ubwubatsi ariko amakuru yatanzwe n’abaturage.

Alexis Namahoro